கொரோனாவால் உயிரிழந்து யாரும் உரிமைகோராமல் எரியூட்டப்பட்ட உடலின் அஸ்தியை சேகரித்து கங்கையில் கரைக்கும் தன்னார்வலர்கள்

தகனம் செய்யும் பகுதியில் எந்நேரமும் கொரோனாவால் உயிரிழந்தோரின் உடல்கள் குவிவதாலும், அங்கு மக்கள் கூட்டமாக வருவதாலும் கொரோனா மேலும் பரவும் அச்சம் எழுந்துள்ளது. இதனால், கொரோனாவால் உயிரிழந்து எரியூட்டப்பட்ட தங்கள் குடும்ப உறுப்பினரின் அஸ்தியை வாங்கக்கூட சிலர் வருவதில்லை.

இந்நிலையில், தலைநகர் டெல்லியில் கொரோனாவால் உயிரிழந்து யாரும் உரிமைகோராமல் எரியூட்டப்பட்ட உடலின் அஸ்தியை ஆகாஷ் கஷ்யப் என்ற தன்னார்வலர் சேகரித்து வருகிறார்.

அவ்வாறு சேகரிக்கும் அஸ்தியை அவர் இந்து மத முறைகளை பின்பற்றி இறுதி மரியாதை செலுத்தி கங்கை நதியில் கரைக்கிறார். இந்த நடவடிக்கையை ஆகாஷ் உடன் இணைந்து மேலும் சில தன்னார்வலர்கள் குழுவாக மேற்கொள்கின்றனர். தன்னார்வலர் ஆகாஷ் மற்றும் அவரது குழுவினர் செயலுக்கு பல்வேறு தரப்பினரும் பாராட்டு தெரிவித்துள்ளனர்.