பிரீ-பயோடிக் உணவு: பழங்கள், காய்கறிகள், பீன்ஸ், முழுதானியங்கள், வெங்காயம், வாழைப்பழம், கடற்பாசி போன்றவைகளில் இந்த சத்து காணப்படுகிறது. அவற்றில் உள்ள பாக்டீரியாக்கள் உடல் ஆரோக்கியத்தை பேணுவதற்கு உதவுகின்றன.

வைட்டமின் ஏ: இதில் ஆன்டி-ஆக்ஸிடென்டுகள் நிறைந்துள்ளன. அவை நோய் எதிர்ப்பு உயிரணுக்களை ஆரோக்கியமாக உருவாக்க உதவுகின்றன. பூசணி, சர்க்கரைவள்ளிக்கிழங்கு, கேரட், கீரை, மாம்பழம் போன்றவைகளில் வைட்டமின் ஏ அதிகம் காணப்படுகிறது.

வைட்டமின் சி: சிட்ரஸ் பழங்களான ஸ்ட்ராபெர்ரி, காலிபிளவர், ப்ரோக்கோலி, தக்காளி, சர்க்கரைவள்ளிக்கிழங்கு ஆகியவைகளில் வைட்டமின் சி நிறைந்திருக்கிறது. அது பல்வேறு நோய்களை எதிர்த்துப் போராட உதவுகிறது. மேலும் வைட்டமின் சி, சுவாச பிரச்சினைகளுக்கும் தீர்வாகிறது.

துத்தநாகம்: இது வைரஸ் தொற்றுகளின் தீவிரத்தை குறைக்கிறது. உடல் ஆரோக்கியத்திற்கு ரத்த வெள்ளை அணுக்கள் இன்றியமையாதவை. தொற்றுநோய்களுக்கு எதிராக போராடும் தன்மை கொண்ட அவற்றை உருவாக்குவதில் துத்தநாகம் முக்கிய பங்கு வகிக்கிறது. உடலில் துத்தநாகம் சத்து குறைபாடு இருந்தால் மருத்துவரிடம் ஆலோசனை பெற்று அதற்குரிய மருந்து, மாத்திரைகளை உட்கொள்ளவேண்டும்.

வைட்டமின் ஈ: காய்கறிகளில் இருந்து தயாரிக்கப்படும் எண்ணெய், பாதாம், முழு தானியங்கள், கோதுமை மற்றும் சர்க்கரைவள்ளிக்கிழங்கில் வைட்டமின்-ஈ நிறைந்துள்ளது. வைரசால் ஏற்படும் தொற்றுநோய்களை அவை தடுக்கின்றன. சுவாச கோளாறு பிரச்சினைகளையும் போக்கும் தன்மை கொண்டது.

தூக்கமின்மை: உடல் தனக்கு தேவையான ஓய்வினை பெற்று, சக்தியை மேம்படுத்திக்கொள்ள போதுமான அளவு தூங்கவேண்டும். தூங்கும்போது நோய்த்தொற்றுகளுக்கு எதிராக போராடும் சைட்டோகைன் வெளியிடப்படும். ஆனால் குறைவான நேரம் தூங்குவது, தூக்கமின்மையால் இரவில் தவிப்புக்குள்ளாவது சைட்டோகைன்கள் வெளியீட்டை குறைத்துவிடும். இது நோய்த்தொற்றுகள் உடலில் புக காரணமாகிவிடும்.

உடல் பருமன்: கொரோனா வைரஸ் சாதாரணமான நபரை விட பருமனான உடல்வாகு கொண்டவர்களை அதிகம் பாதிக்கும். அவர்களின் உடலில் இருக்கும் கொழுப்பு திசுக்கள் அடிபோசைட்டோகின்களை உருவாக்குகின்றன. இது அழற்சி செயல் முறையை ஊக்குவித்து உடலை பாதிக்கச்செய்யும்.

சுற்றுச்சூழல்: வசிப்பிட சுகாதாரமும் ஆரோக்கியத்தில் தாக்கத்தை ஏற்படுத்துகிறது. காற்றில் கலந்திருக்கும் புகை மற்றும் பிற துகள்கள் நோய் எதிர்ப்பு மண்டலத்தின் செயல்பாட்டை மோசமாக்கும். அதனால் நோய்த்தொற்றுக்கான சூழல்கள் அதிகரிக்கும். வயதாகும்போது உள்உறுப்புகளின் செயல்திறன் குறைந்துபோகும். எலும்பு மஜ்ஜையின் ஆற்றலும் குறையும். அதனால் சரியான உணவுப்பழக்கமும், முறையான உடற் பயிற்சியும் உடலுக்கு அவசியம்.