விபத்தில் காயம் அடைந்தவர்கள்; சேதமடைந்த வாகனத்தின் உரிமையாளர்கள்; வாகன விபத்தில் உயிரிழந்தவரின் வாரிசுகள் அல்லது சட்டரீதியான பிரதிநிதிகள் ஆகியோர் இழப்பீடு பெறலாம். விபத்தில் தொடர்புடைய வாகன உரிமையாளரோ, ஓட்டுனரோ அல்லது வாகன காப்பீட்டு கழகமோ கூட்டாக இழப்பீட்டைக் கொடுக்க கடமைப்பட்டவராவர். விபத்து நேரிட்டால், விபத்தை ஏற்படுத்திய நபரோ அல்லது அதைப் பார்த்தவரோ ஆம்புலன்சை வரவழைத்து பாதிக்கப்பட்டவரை மருத்துவமனைக்கு அனுப்பிவிட்டு, போக்குவரத்து காவலருக்கும் தகவல் தரவேண்டும். தகவல் தெரிவிப்பவர் மீது எவ்வித நடவடிக்கையும் கிடையாது. போக்குவரத்து காவலர் விபத்து நடந்த இடத்தைப் பார்வையிட்டு விசாரித்த பின்னர் விபத்தை ஏற்படுத்தியவர் மீது கிரிமினல் வழக்கும், விபத்தில் பாதிப்படைந்தவருக்காக சிவில் வழக்காகவும் பதிவு செய்வார். அதனால் விபத்தை ஏற்படுத்தியவர் மீது எக்காரணம் கொண்டும் வன்முறையில் ஈடுபட சட்டத்தில் இடமில்லை. விபத்தை ஏற்படுத்தியவர் சட்டப்படி பெயில் கோரி வழக்கு முடியும் வரை காவல் நிலையத்தில் ஆஜராக வேண்டும். காவலருக்கு உதவியாக விபத்தில் தொடர்புடைய வாகன எண், ஓட்டுனர் பெயர், வயது, முகவரி மற்றும் ஓட்டுனர் உரிமம் ஆகியவற்றை அளிக்க வேண்டும். குடிபோதையில், அதிவேகத்துடன் ஓட்டியவர்கள், ஓட்டுனர் உரிமம் இல்லாமலும் அல்லது தகுதிக்குரிய வயது இல்லாமல் ஓட்டியவர்கள் ஆகியோர் மீது கிரிமினல் நடவடிக்கை தொடரப்படும்.

முதல் தகவல் அறிக்கை தயார் செய்த போக்குவரத்து காவலர், விபத்து நிகழ்ந்த எல்லைக்குட்பட்ட காவல்நிலையம் மூலமாக சார்பு நீதிமன்றம் அல்லது மாவட்ட நீதிமன்றம் அல்லது இழப்பீடு பெற தனியாக அமைக்கப்பட்ட தீர்ப்பாயம் ஆகிய ஏதேனும் ஒன்றில் 30 தினங்களுக்குள் இழப்பீடு கோரி வழக்கு தாக்கல் செய்வார்.

நீதிமன்றமே நேரிடையாக விசாரணை செய்து விபத்தில் பாதித்தவரது வயது, வருமானம், பாதிப்பின் தன்மை பொருளாதார ரீதியான பாதிப்பா அல்லது மருத்துவ சிகிச்சை முடிந்து உடனடியாக பணிக்கு திரும்பும் வரையான பாதிப்பா அல்லது கை கால்கள் செயல்படா வண்ணம் உள்ள ஊனமான பாதிப்பா அல்லது மன ரீதியான பாதிப்பா என ஆய்வு செய்து விபத்துக்குள்ளானவரின் வருமான பாதிப்பு, ஊனமடைந்திருந்தால் பாதிப்பின் சதவீதம், போக்குவரத்து செலவினம், உட்கொண்ட மருந்து மாத்திரைகள் மற்றும் மருத்துவமனை செலவினங்கள் போன்றவற்றை கணக்கில் கொண்டு ஒரு தொகையை தீர்ப்புரைக்கும். அந்தத் தொகையை பாதிக்கப் பட்டவருக்கு வாகன உரிமையாளரோ அல்லது காப்பீட்டுக் கழகமோ வழங்க வேண்டும். இழப்பீடு தொகை போதுமானதாக இல்லையெனில் மேல்முறையீடு செல்லலாம். காப்பீடு செய்யப் படாத வாகனம் என்றால், வாகன உரிமையாளரே வழங்க வேண்டும். அவரால் இயலாது என்றால் வாகனத்தை ஏலம் மூலம் விற்பனை செய்து, பாதிக்கப்பட்டவருக்கு வழங்க வேண்டும். அதிவேகமாக வாகனத்தில் செல்ல வேண்டும் என்பதை தவிர்த்து, சாலை விதிகளை மதித்து, விபத்தில்லா பயணம் செய்ய வேண்டும் என்ற எண்ணம் தோன்றினால் தான் விபத்துகள் குறைய வாய்ப்புண்டு!

- கே.சுப்ரமணியன், வக்கீல், சென்னை உயர்நீதி மன்றம்