மதுரை,
மதுரை முனிச்சாலை ரோடு ருக்மணிபாளைய பகுதியை சேர்ந்தவர் ராமு. இரும்பு கடை வைத்துள்ளார். இவரது மகன் கோபி (வயது 19). பிளஸ் 2 முடித்து, தந்தைக்கு உதவியாக இருந்து வந்தார். இன்னொரு மகன் கிஷோர் (வயது 18). பிளஸ் 2 முடித்துள்ளார்.
இந்த சகோதரர்களின் நண்பர்கள் ஹரிஹரன் (வயது 17) மற்றும் சூர்யகுமார் (வயது 15). இவர்கள் தவிர 4 பேர் ஒத்தக்கடை அருகேயுள்ள துக்கலப்பட்டி பெரியாறு பாசன கால்வாய்க்கு குளிக்க சென்றனர்.
இந்த நிலையில், நேற்று மாலை 4 மணிக்கு, மின்திட்ட பணிக்காக கால்வாயில் அமைக்கப்பட்ட பகுதியில் குளித்தபோது 4 பேரும் நீரில் மூழ்கினர். அவர்களது நண்பர்கள் இதுபற்றி போலீசுக்கு தகவல் தெரிவித்தனர். மேலுர் தீயணைப்பு வீரர்கள், ஒத்தக்கடை போலீசார் மற்றும் அப்பகுதி மக்கள் மீட்பு பணியில் ஈடுபட்டனர்.
இதில் கோபி, கிஷோர், ஹரிஹரன் ஆகிய 3 பேரின் உடல்கள் மீட்கப்பட்டு உள்ளன. சூர்யகுமாரை மீட்டு சிகிச்சைக்காக மருத்துவமனைக்கு அனுப்பி வைத்துள்ளனர்.