மதுரை மீனாட்சி அம்மன் கோவிலில் 12 மாதங்களும் திருவிழா நடைபெறும். இதில் சித்திரை திருவிழா உலகப்புகழ் பெற்றது. 12 நாட்கள் நடைபெறும் இந்த திருவிழாவை காண உள்ளூர் மட்டுமில்லாமல் வெளியூர், வெளிமாநிலங்கள், வெளிநாடுகளில் இருந்தும் பக்தர்கள் வருவர். இவ்வளவு சிறப்பு வாய்ந்த சித்திரை திருவிழா கடந்தாண்டு கொரோனா காரணமாக ரத்து செய்யப்பட்டது.

இந்த ஆண்டும் கொரோனா பரவல் 2-ம் அலை காரணமாக கோவில்களில் திருவிழாக்கள் அனைத்தும் ரத்து செய்யப்பட்டன. ஆனால் மீனாட்சி அம்மன் கோவில் நிர்வாகமும், பல்வேறு அமைப்பினரும், பக்தர்களும் திருவிழாவை நடத்த அரசிடம் கோரிக்கை விடுத்தனர். இதை ஏற்று கோவிலுக்குள் உள்திருவிழாவாக நடத்த அரசு அனுமதி அளித்தது. அதனை தொடர்ந்து கடந்த 15 ஆம் தேதி சித்திரை திருவிழா கொடியேற்றத்துடன் தொடங்கியது.