சென்னை,
தமிழக அரசு வெளியிட்ட செய்திக்குறிப்பில் கூறப்பட்டு இருப்பதாவது:-
தமிழ்நாடு சட்டசபையில் அவை விதி 110-ன் கீழ் 7.9.2021 அன்று, சத்துணவு மையங்களில் பணிபுரியும் சத்துணவு சமையலர்கள் மற்றும் சமையல் உதவியாளர்கள் ஆகியோரின் ஓய்வுபெறும் வயது 58-லிருந்து 60 ஆக உயர்த்தப்படும் என்று முதல்-அமைச்சர் அறிவிப்பு வெளியிட்டார்.அதை செயல்படுத்தும் விதமாக, சத்துணவு மையங்களில் பணிபுரியும் சமையலர்கள் மற்றும் சமையல் உதவியாளர்கள் ஆகியோரின் ஓய்வுபெறும் வயது 58-லிருந்து 60 ஆக உயர்த்தி ஏற்கனவே அரசாணை வெளியிடப்பட்டுள்ளது.
இந்த பணியாளர்கள் பயன்பெற்று வருவதைப் போல் ஒருங்கிணைந்த குழந்தை வளர்ச்சிப் பணிகள் திட்டத்தின் கீழ் உள்ள குழந்தைகள் மையங்களில் பணிபுரியும் அங்கன்வாடி உதவியாளர்கள் பயன்பெறும் வண்ணம், அவர்களின் ஓய்வுபெறும் வயதை 58-லிருந்து 60 ஆக உயர்த்தி ஆணை வெளியிடப்பட்டுள்ளது.இதனால் 40 ஆயிரத்து 601 அங்கன்வாடி உதவியாளர்கள் பயனடைவர்.
இவ்வாறு அதில் கூறப்பட்டுள்ளது.