புரெவி புயல் காரணமாக ராமேசுவரத்தில் நேற்று 4-வது நாளாக விடிய விடிய பலத்த மழை பெய்தது. தொடர் மழையால் ஏராளமான வீடுகளை மழைநீர் சூழ்ந்தது. அதுபோல் 200-க்கும் மேற்பட்ட வீடுகளில் உள்ளேயும் மழைநீர் புகுந்தது. இதேபோல் பாம்பன், தங்கச்சிமடம் பகுதியிலும் 4-வது நாளாக பலத்த மழை பெய்தது. சின்னப்பாலம் பகுதியில் உள்ள வீடுகளை மழைநீர் சூழ்ந்துள்ளதுடன், ஒரு சில வீடுகளிலும் புகுந்துள்ளது. சில நாட்களாக நீடித்த கடல்சீற்றம் சற்று தணிந்துள்ளது.

4 நாட்களாக தொடர்ந்து மழை பெய்ததால் மின்சாரம் தடைப்பட்டு ராமேசுவரம் பகுதி முழுவதும் இருளில் மூழ்கியது. இந்தநிலையில் நேற்று மதியம் 1 மணி அளவில் பழுது சரிபார்க்கப்பட்டு, மின் வினியோகம் வழங்கப்பட்டது. புரெவி புயலால் கடல் சீற்றம் அதிகரித்தது. பலத்த சூறாவளி காற்றும் வீசியது. இதனால் பாம்பன் குந்துகால் அருகே உள்ள குருசடை தீவு பகுதியில் பலத்த சேதம் ஏற்பட்டுள்ளது.

புரெவி புயல் காரணமாக காவிரி டெல்டா மாவட்டங்களான தஞ்சை, நாகை, திருவாரூர் மாவட்டங்களில் கடந்த 4 நாட்களாக தொடர்ந்து மழை பெய்து வருகிறது. தஞ்சை மாவட்டத்தில் அறுவடைக்கு தயாராக இருந்த நெற்பயிர்களில் தண்ணீர் தேங்கி உள்ளது. சில இடங்களில் நெற்பயிர்கள் அழுகி காணப்படுகின்றன. இதுவரை 25 ஆயிரத்துக்கும் மேற்பட்ட ஏக்கரில் நெற்பயிர்கள் நீரில் மூழ்கி காணப்படுகின்றன.

திருவாரூர் மாவட்டத்தில் கன மழையினால் 1 லட்சத்து 50 ஆயிரம் ஏக்கர் சம்பா, தாளடி பயிர்கள் நீரில் முழ்கியுள்ளது. இதில் முன்பட்ட சம்பா சாகுபடி செய்யப்பட்டு அறுவடைக்கு தயாரான 123 ஏக்கர் நெற் பயிர்கள் நீரில் மூழ்கியுள்ளது.

நாகை மாவட்டத்தில் கடந்த 4 நாட்களாக பெய்து வரும் கனமழை காரணமாக இளம் பயிரான தாளடியும், தாழ்வான பகுதியில் உள்ள சம்பாவும் நீரில் மூழ்கியது. மாவட்டத்தில் 1 லட்சத்து 25 ஆயிரத்து 981 ஏக்கரில் சாகுபடி செய்யப்பட்டுள்ள நெற்பயிர்கள் மழை நீரில் மூழ்கியுள்ளன.