முன்னதாக விழா தொடங்கும்போது, சமஸ்கிருத மொழியில் மகா கணபதி இறை வணக்கம் பாடல் பாடப்பட்டது. பொதுவாக தமிழகத்தில் நடைபெறும் விழாக்களில் தமிழ்த்தாய் வாழ்த்து பாடுவதுதான் மரபு. ஆனால் மத்திய அரசின் கட்டுப்பாட்டின் கீழ் இயங்கி வரும் ஐ.ஐ.டி.யில் சமஸ்கிருதத்தில் இறை வணக்கம் பாடப்பட்டது சர்ச்சையை ஏற்படுத்தியுள்ளது.

இது தமிழ் ஆர்வலர்கள் மத்தியில் அதிருப்தியை ஏற்படுத்தியுள்ளது. ஏற்கனவே விமான நிலையங்களில் தமிழில் அறிவிப்பை நீக்குவது, தமிழக பள்ளிகளில் சமஸ்கிருதத்தை திணிக்க முயற்சிப்பது என்று பல்வேறு சர்ச்சைகள் நிலவி வரும் நிலையில் ஐ.ஐ.டி.யில் சமஸ்கிருத பாடல் பாடப்பட்டது தற்போது புது சர்ச்சையை ஏற்படுத்தியுள்ளது.

ஆனால் ஐ.ஐ.டி. நிர்வாகம் இந்த சர்ச்சைக்கு விளக்கம் தெரிவித்து, முற்றுப்புள்ளி வைத்துள்ளது.

இதுகுறித்து சென்னை ஐ.ஐ.டி. இயக்குனர் பாஸ்கர் ராமமூர்த்தி கூறியதாவது:-

சென்னை பல்கலைக்கழகத்தை போன்று ஐ.ஐ.டி.யில் இசைத்துறை கிடையாது. பாடல்களுக்காக மாணவர்களுக்கு பயிற்சி அளிப்பதும் கிடையாது. பாடல்கள் படித்தவர்கள் பகுதி நேர பாடகர்கள். தேசிய கீதம் உள்பட எந்த பாடல்களும் பதிவு செய்யப்பட்ட பாடல்களை நாங்கள் ஒலிபரப்பவில்லை. எனவே சமஸ்கிருத பாடல் தொடர்பான சர்ச்சை தேவையற்றது.

மாணவர்கள் தாங்களாக முன்வந்து சமஸ்கிருத மொழியில் பாடினார்கள். வருங்காலங்களில் தமிழ்த்தாய் வாழ்த்து உள்பட அனைத்து பாடல்களும் பதிவு செய்யப்பட்டு, ஒலிபரப்புவதை காட்டிலும் மாணவர்களின் மூலம் வாய்மொழியாக பாடப்படும்.

இவ்வாறு அவர் கூறினார்.