எடப்பாடி பழனிசாமி முதல்-அமைச்சர் என்று ஓ.பன்னீர்செல்வமே பிரசாரம் செய்யவில்லை. இந்த சோகத்தை மறைக்க, இந்த வெட்கத்தை மறைக்க, தி.மு.க. மீதும் என் மீதும் பழி போடுகிறார் எடப்பாடி பழனிசாமி. தி.மு.க.வை குடும்பக்கட்சி என்று எடப்பாடி பழனிசாமி சொல்லியிருக்கிறார்.

ஏழைகளுக்கு கொடுப்பதைத் தடுக்கும் இவர் ஒரு தலைவரா என்று கேட்டுள்ளார் எடப்பாடி பழனிசாமி. கொடுப்பதை நான் தடுக்கவில்லை. ஏன் குறைவாகக் கொடுக்கிறீர்கள் என்று தான் கேட்டேன். ஏப்ரல் மாதம் முதல் ரூ.5 ஆயிரம் கொடுங்கள் என்று சொன்னவன் நான். அப்போதெல்லாம் கொடுக்காத எடப்பாடி பழனிசாமி, இன்று அவர் ஏழைகளுக்கு இரக்கப்பட்டு ரூ.2,500 தரவில்லை; தேர்தலுக்காகக் கொடுக்கிறார். அரசு பணத்தை அ.தி.மு.க. நலனுக்காக கொடுக்கிறார். அ.தி.மு.க. டோக்கன் கொடுத்து அவர்தான் மாட்டிக் கொண்டார்.

மு.க.ஸ்டாலின் தூங்கிக் கொண்டு இருந்தாரா என்று கேட்கும் எடப்பாடி பழனிசாமிக்குச் சொல்கிறேன். நான் தூங்க மாட்டேன். நான் தூங்குகிறேனா, விழித்திருக்கிறேனா என்பது விழித்திருப்பவர்களுக்குத்தான் தெரியுமே தவிர, தூங்கும் எடப்பாடி பழனிசாமிக்குத் தெரியாது. எடப்பாடி பழனிசாமி கூட்டத்தின் ஆட்டத்தை முடிக்கும் வரை தூக்கம் இல்லை.

தமிழகத்துக்குத் துயரமான ஆட்சி இது. இந்தத் துயரம் களையப்பட வேண்டும். தமிழகத்துக்குத் துக்கமான ஆட்சி இது. இந்த துக்கத்துக்கு முற்றுப்புள்ளி வைத்தாக வேண்டும். தமிழகத்துக்குக் களங்கமான ஆட்சி இது. இந்தக் களங்கம் நீக்கப்பட வேண்டும். தமிழகத்துக்குக் கறை படிந்த ஆட்சி இது. இந்தக் கறை கழுவப்பட வேண்டும். தமிழகத்தை சீரழித்த ஆட்சி இது. இது சீர்செய்யப்பட வேண்டும். தமிழகத்தை வஞ்சித்த ஆட்சி இது. இந்த வஞ்சகம், நிறுத்தப்பட வேண்டும். தமிழகத்துக்கு துரோகம் செய்த ஆட்சி இது. அத்தகைய துரோகிகள் துரத்தப்பட வேண்டும். இது ஒரு இருண்ட காலம். அது இன்றோடு முடியவேண்டும்.

இன்று (நேற்று) 2020-ம் ஆண்டின் இறுதிநாள். நாளை (இன்று) 2021 புத்தாண்டு பிறக்கும்போது அது தமிழகத்துக்கு புதிய விடியலைத் தரும் நாளாக விடியட்டும்.

இவ்வாறு அவர் பேசினார்.