உரிமைக்குழு சார்பில் தமிழக அரசின் சிறப்பு மூத்த வக்கீல் ஏ.எல்.சோமயாஜி ஆஜராகி வாதிட்டு வருகிறார். இந்த வழக்கு 3-வது நாளாக நீதிபதிகள் முன்பு நேற்று விசாரணைக்கு வந்தது. அப்போது, அரசின் சிறப்பு மூத்த வக்கீல் ஏ.எல்.சோமயாஜி தொடர்ந்து வாதிட்டார். அப்போது அவர் கூறியதாவது:-

தி.மு.க. உறுப்பினர்களுக்கு உரிமைக்குழு நோட்டீஸ் அனுப்பியதில் எந்த ஒரு காழ்புணர்ச்சியோ, உள்நோக்கமோ கிடையாது. நோட்டீஸ் மட்டுமே அனுப்பப்பட்டதே தவிர அவர்கள் மீது நடவடிக்கை எதுவும் எடுக்கவில்லை. அதற்கு முன்கூட்டியே அவர்கள் இந்த ஐகோர்ட்டை நாடியுள்ளனர். மாற்று முறையில் தீர்வுகாண அவர்களுக்கு வழி உள்ளது.

மாநிலத்தில் தடை செய்யப்பட்ட பொருட்களை அவைக்குள் கொண்டு வந்ததை மனுதாரர்கள் தரப்பு ஒப்புக்கொள்கிறது. எனவே, இவர்களது செயல் அவையின் உரிமை மீறலா? இல்லையா? என்பது முடிவு செய்ய வேண்டியதுள்ளது. இதுகுறித்து விசாரணை நடத்தி முடிவு எடுக்க உரிமைக்குழுவுக்கு உத்தரவிட சபாநாயகருக்கு முழு அதிகாரம் உள்ளது.

இவ்வாறு அவர் வாதிட்டார்.

இந்த வழக்கின் அனைத்து தரப்பு வாதங்களும் நேற்றுடன் முடிவடைந்ததை தொடர்ந்து, வழக்கின் தீர்ப்பை தேதிக் குறிப்பிடாமல் தள்ளிவைத்து நீதிபதிகள் உத்தரவிட்டனர்.