இதுதவிர கூட்டுறவு சங்கங்கள், பெண்கள் சுய உதவிக்குழுக்கள், மீனவர் சங்கங்கள், நடமாடும் நியாயவிலைக்கடை என்று மொத்தம் தமிழகத்தில் 35 ஆயிரத்து 232 நியாயவிலைக் கடைகள் உள்ளன. இந்த கடைகள் அனைத்திலும் கண்காணிப்பு கேமரா பொருத்துவதற்கு ரூ.97 கோடி செலவாகும் என்று கூறப்பட்டது.

இந்த வழக்கை விசாரித்த நீதிபதி பிறப்பித்த உத்தரவில் கூறியிருப்பதாவது:-

கூட்டுறவு சங்கங்களின் பதிவாளர், உணவு, கூட்டுறவு மற்றும் நுகர்வோர் பாதுகாப்புத்துறை முதன்மை செயலாளருக்கு கடந்த ஜனவரி 8-ந்தேதி எழுதியுள்ள கடிதத்தில், நியாயவிலை கடைகளில் முறைகேடுகள் நடப்பதை தடுக்க அனைத்து பயனாளிகளுக்கும், ஸ்மார்ட் கார்டு வழங்கப்பட்டுள்ளது. தாங்கள் வாங்கும் பொருட்கள் தொடர்பான தகவல்களை அவர்களது செல்போனில் தெரிந்துக்கொள்ளும் வகையில் இணைப்புகள் தரப்பட்டுள்ளன.

1,500 குடும்ப அட்டைகள் மேல் உள்ள 416 கடைகளில் ரூ.5 கோடியே 94 லட்சம் செலவில் 2 கட்டங்களாக கண்காணிப்பு கேமரா பொருத்த நடவடிக்கை எடுக்கப்பட்டுள்ளது. சரக்கு கிடங்குகளில் இருந்து லாரிகளில் பொருட்களை ஏற்றுவதை கண்காணிக்கவும், அனைத்து கிடங்குகளில் கேமரா பொருத்தப்பட்டுள்ளன என்று கூறியுள்ளார்.

மேலும் அந்த கடிதத்தில், நியாயவிலைக் கடைகளில் முறைகேடுகளை முற்றிலும் தடுப்பதற்காக குடும்ப அட்டைதாரர்களின் விரல் ரேகை பதிவான பயோமெட்ரிக் முறை கொண்டு வருவதற்கு திட்டம் வகுக்கப்பட்டுள்ளது. குடும்ப அட்டையில் உள்ள ஏதாவது ஒரு நபர் கைரேகையைப் பதிவு செய்தால் போதுமானது. இதன் மூலம் முறைகேடுகள் முற்றிலும் களையப்படும் என்றும் கூறப்பட்டுள்ளது. இந்த கடிதத்தை சிறப்பு அரசு பிளடர் எல்.பி.சண்முகசுந்தரம், ஐகோர்ட்டில் தாக்கல் செய்துள்ளார். எனவே, இந்த கடிதத்தை பதிவு செய்து கொள்கிறேன். அதேநேரம், இந்த கடிதத்தின் மீது எடுக்கப்பட்ட நடவடிக்கை குறித்து வருகிற மார்ச் 11-ந்தேதி கூட்டுறவு, உணவு மற்றும் நுகர்வோர் பாதுகாப்புத் துறை முதன்மை செயலாளர் அறிக்கை தாக்கல் செய்ய வேண்டும். இவ்வாறு நீதிபதி உத்தரவில் கூறியுள்ளார்.