திருவொற்றியூர் சாலையில் கனமழையுடன் கடல் காற்று அதிகமாக வீசியது. அபாயகரமான சூழ்நிலையில் இளைஞர்கள் மற்றும் பெண்கள் உள்பட பலர் குடும்பம், குடும்பமாக சென்று அலைகளின் சீற்றத்தை வேடிக்கை பார்த்தனர். அத்துடன் செல்போன் மூலம் செல்பியும் எடுத்து மகிழ்ந்தனர்.

ராயபுரம், சூரியநாராயணசாலையில் மரங்கள் முறிந்து சாலைகளில் விழுந்து கிடந்தது. அதேபோல் ஸ்டான்லி மருத்துவ கல்லூரி மருத்துவமனை எதிரில் ஆட்கள் நடமாட்டம் இல்லாமல் வெறிச்சோடி கிடந்தது. ஓட்டல்கள் மற்றும் டாஸ்மாக் கடைகளை தவிர்த்து மீதம் உள்ள அனைத்து கடைகளும் மூடப்பட்டு கிடந்தது. கனமழையிலும் டாஸ்மாக் கடைகளிலும் மட்டும் மதுபிரியர்கள் கூட்டம் அதிகரித்து காணப்பட்டதால் அமோக விற்பனை நடந்து உள்ளதாக தெரிவிக்கப்படுகிறது.

காற்றின் வேகத்தை தாக்கு பிடிக்காமல் சாலைகளில் அமைக்கப்பட்டு இருந்து இரும்பு தடுப்பு வேலிகள் அனைத்தும் நிலை தடுமாறி சாலையில் விழுந்து கிடந்தன. உடனடியாக அவற்றை அப்புறப்படுத்தும் பணியும் நடந்தது.

சென்னை துறைமுகத்தில் 9-வது புயல் எச்சரிக்கை கூண்டு நேற்று ஏற்றப்பட்டது. தொடர்ந்து காற்றின் வேகத்தையும், கடலின் சீற்றத்தையும் கண்காணிப்பு அறையில் இருந்து அதிகாரிகள் கண்காணித்து கொண்டே இருந்தனர். பகலில் 34 கடல்மைல் வேகத்தில் வீசிய காற்று நேற்று மாலையில் 50 நாட்டிக்கல் மைல் வேகத்தில் அதிகரித்தது. இதனால் சென்னை துறைமுக வாயில் மூடப்பட்டு, எந்த வாகனங்களும் உள்ளே அனுமதிக்கவில்லை. அத்துடன், கப்பல்களில் வரும் சரக்குகளை இறக்குவதற்கு பயன்படும் ராட்சத கிரேன்களும் கடற்கரையில் இருந்து வெகு தொலைவிற்கு கொண்டு வந்து பாதுகாப்பாக வைக்கப்பட்டன. அதேபோல் நடுக்கடலுக்கு கொண்டு செல்லப்பட்ட கப்பல்களும் பாதுகாப்பான முறையில் நிலை நிறுத்தப்பட்டதையும் அதிகாரிகள் உறுதி செய்தனர். தொடர்ந்து நிலமையை தொடர்ந்து அதிகாரிகள் கண்காணித்து வந்தனர்.

சென்னை எம்.ஜி.ஆர். சென்டிரல் ரெயில் நிலையம் எதிரில் சுரங்கப்பாதை அமைக்கப்பட்டு வருகிறது. இந்தப்பாதையில் மழை நீர் புகுந்து கட்டுமானங்கள் சேதமடைந்தன. தகவல் அறிந்ததும் உடனடியாக சம்பந்தப்பட்ட அதிகாரிகள் வந்து ஆய்வு செய்தனர். அந்தவழியாக வாகனங்கள் சென்றால் சுரங்கத்துக்குள் விழுவதற்கு வாய்ப்பு உள்ளது என்பதால், எழும்பூரில் இருந்து சென்டிரல் நோக்கி செல்லும் சாலையை தற்காலிகமாக மூடி போலீஸ் பாதுகாப்பு போட்டனர். தொடர்ந்து அப்பகுதியில் பொக்லைன் எந்திரம் மூலம் மழை நீர் அப்புறப்படுத்தும் பணியும் நடந்தது.

கனமழையால் சிந்தாதிரிப்பேட்டை கூவம் சாலையில் தேங்கிய மழைநீரை அப்புறப்படுத்த நடைபாதையை பொக்லைன் எந்திரம் மூலம் உடைத்து அப்புறப்படுத்திவிட்டு, தண்ணீரை கூவம் ஆற்றுக்கு திருப்பி விட்டனர். இதன் பிறகு சாலையில் தேங்கிய மழை நீர் கூவம் ஆற்றுக்குள் வடிந்தது. அதேபோல் பல்வேறு இடங்களில் உள்ள மழை நீர் கூவம் ஆற்றில் பெருக்கெடுத்து ஓடியது. ஊருக்குள் புகுந்துவிடக் கூடாது என்பதால் நேப்பியர் பாலம் அருகில் முகத்துவாரம் திறந்துவிடப்பட்டதால் மழை நீர் கடலில் சென்றது. ஆக மொத்தத்தில் வடசென்னை பகுதியை கனமழை புரட்டி போட்டது. இதனால் பொதுமக்களின் இயல்பு வாழ்க்கை முற்றிலும் பாதிக்கப்பட்டது.