உடல்நலம் பாதிக்கப்பட்டவர்கள் தொலைதூரத்தில் இருந்து மாநகரத்திற்கு வந்து சிகிச்சை பெறுவதன் மூலம் விலை மதிப்பு மிக்க உயிரை காப்பாற்ற முடியும் என்பதால் தமிழகத்திலும் ஹெலிகாப்டர் ஆம்புலன்ஸ் திட்டம் செயல்படுத்தப்படும் என்று அவர் அறிவித்தார்.

அதன்படி இந்த திட்டம் தற்போது செயல்பாட்டுக்கு வந்து உள்ளது. தமிழகத்தில் உள்ள அரசு மருத்துவ கல்லூரி மருத்துவமனைகள் மற்றும் தலைமை மருத்துவமனைகளில் ஹெலிகாப்டர் இறங்குதளம் அமைக்க தமிழக அரசு உத்தரவிட்டு உள்ளது. இந்த ஹெலிகாப்டர் இறங்குதளம் அமைக்கும் பணிகளில் பொதுப்பணித்துறை தீவிரமாக இறங்கியுள்ளது.

இதுகுறித்து பொதுப்பணித்துறை அதிகாரிகள் கூறியதாவது:-

விபத்து மற்றும் இயற்கை இடர்பாடுகளில் சிக்குபவர்களை உரிய நேரத்தில் மருத்துவமனைகளில் சேர்ப்பதற்காக வெளிநாடுகளில் ஹெலிகாப்டர் ஆம்புலன்ஸ் சேவை உள்ளது. இதேபோன்று தமிழகத்திலும் விரைவில் ஹெலிகாப்டர்கள் பயன்படுத்தப்பட உள்ளன.

இதற்காக தமிழகத்தில் உள்ள அரசு மருத்துவ கல்லூரி மருத்துவமனைகள் மற்றும் தலைமை அரசு மருத்துவமனைகளில் 30 மீட்டர் நீளம், 15 மீட்டர் அகலத்தில் ஹெலிகாப்டர் இறங்குதளம் அமைக்க முடிவு செய்யப்பட்டு உள்ளது. ரூ.10 லட்சம் செலவில் சர்வதேச தரத்தில் ஹெலிகாப்டர் இறங்குதளம் அமைக்கப்பட உள்ளது.

ஹெலிகாப்டர் இறங்குதளத்தை மருத்துவமனைகளின் மொட்டை மாடிகளில் அமைக்க முதலில் திட்டமிடப்பட்டது. ஆனால் ஹெலிகாப்டர்கள் மொட்டை மாடியில் தரையிறங்கும் போது ஏற்படும் அதிர்வுகளால் மற்ற நோயாளிகள் பாதிக்கப்படக்கூடும் என்பதாலும், தடிமனான கான்கிரீட் போன்றவை அமைக்க வேண்டியிருப்பதாலும் அதனை தவிர்த்து விட்டு, மருத்துவமனை வளாகத்திலேயே தரையில் அமைக்க முடிவு செய்யப்பட்டு உள்ளது.

நீலகிரி மாவட்டம் ஊட்டியில் விரைவில் கட்டப்பட உள்ள பன்னோக்கு மருத்துவமனையிலும் தற்போது ஹெலிகாப்டர் இறங்குதளம் அமைக்க இருக்கிறோம். தொடர்ந்து வரும் காலங்களில் புதிதாக கட்டப்படும் அனைத்து மருத்துவ கல்லூரி மருத்துவமனைகளிலும் ஹெலிகாப்டர் இறங்கும் தளமும் அமைக்க முடிவு செய்யப்பட்டு உள்ளது.

இவ்வாறு அதிகாரிகள் கூறினார்கள்.