ஆற்றுப்பாலத்தை சீரமைக்கும் பணி தீவிரம்

பழனியை அடுத்த மானூரில் சண்முகநதியின் குறுக்கே ஆற்றுப்பாலம் அமைந்துள்ளது. பழனியில் இருந்து மானூர், கோரிக்கடவு மற்றும் அலங்கியம், தாராபுரம் உள்ளிட்ட பகுதிக்கு செல்லும் வாகனங்கள் இந்த பாலம் வழியே செல்கின்றன. முக்கியத்துவம் வாய்ந்த இந்த ஆற்றுப்பாலத்தின் தடுப்புச்சுவர் மற்றும் தூண்கள் பல இடங்களில் சேதமடைந்து காணப்பட்டது. குறிப்பாக தடுப்புச்சுவரில் சிமெண்டு பூச்சுகள் பெயர்ந்து கம்பிகள் வெளியே தெரிந்த வண்ணம் இருந்ததால், பாலம் வழியாக செல்ல வாகன ஓட்டிகள், பொதுமக்கள் மிகுந்த அச்சம் அடைந்து வந்தனர். எனவே இந்த ஆற்றுப்பாலத்தின் உறுதி தன்மை குறித்து ஆய்வு செய்து, போதிய பராமரிப்பு பணிகளை செய்ய வேண்டும் என பொதுமக்கள் தொடர்ந்து வலியுறுத்தி வந்தனர். அதைத்தொடர்ந்து தற்போது நெடுஞ்சாலைத்துறை சார்பில் ஆற்றுப்பாலத்தை சீரமைக்க முடிவு செய்யப்பட்டது.