திருப்பூர் மாநகரில் பின்னலாடை தொழில் பிரதான தொழிலாக உள்ளது. இந்த தொழிலுக்கு நூல் மிகவும் முக்கியம். கடந்த ஜனவரி மாதம் முதல் நூல் விலை ஏறுமுகமாக இருந்து வந்தது. இந்தநிலையில் கடந்த 1-ந் தேதி நூல் விலை கிலோவுக்கு ரூ.50 கூடியது. இதுவரை மொத்தம் ரூ.120 வரை அதிகரித்துள்ளதால் பனியன் உற்பத்தியாளர்கள் மிகவும் பாதிக்கப்பட்டுள்ளனர். நூல் விலை உயர்வை கட்டுப்படுத்த பல்வேறு கோரிக்கைகளை முன்வைத்தும் அரசிடம் இருந்து உரிய பதில் கிடைக்கவில்லை.

இந்தநிலையில் நூல் விலை உயர்வை மத்திய அரசு கட்டுப்படுத்தக்கோரியும், தொழில் சிக்கல் மற்றும் நெருக்கடிகளை தீர்க்க மாநில அரசு உதவ வேண்டும் என்ற கோரிக்கையை வலியுறுத்தி டீமா சங்கத்தின் ஒருங்கிணைப்புடன் பின்னலாடை தொழில் கூட்டமைப்பு உருவாக்கப்பட்டது. இதில் திருப்பூர் ஏற்றுமதியாளர்கள் சங்கம், சைமா, டெக்மா, டெக்பா, பவர்டேபிள், பிரிண்டிங் பட்டறை, சாய, சலவை பட்டறைகள், ரைசிங், காஜாபட்டன், செக்கிங் உள்ளிட்ட அனைத்து பின்னலாடைத்துறையினரும் இடம்பெற்றுள்ளனர்.