அதன்படி தமிழகத்தில் சாலை போக்குவரத்து விதிமீறலுக்கான அபராத தொகையை பல மடங்கு உயர்த்தி தமிழக அரசின் உள்துறை கூடுதல் தலைமை செயலாளர் க.பணீந்திர ரெட்டி சமீபத்தில் அரசாணை வெளியிட்டார்.

புதிய நடைமுறையின்படி 'ஹெல்மெட் அணியாமல் மோட்டார் சைக்கிளில் செல்வோர்களுக்கு அபராத தொகை ரூ.100-லிருந்து ரூ.1,000 ஆகவும், சிக்னலை மதிக்காமல் வாகனங்களில் செல்வோர்களுக்கு ரூ.100-லிருந்து ரூ.500 ஆகவும், செல்போன் பேசியபடி வாகனத்தை ஓட்டுபவர்களுக்கு ரூ.1,000, காரில் 'சீட்' பெல்ட் அணியாமல் சென்றால் ரூ.100-லிருந்து ரூ.1,000 ஆகவும், 'லைசென்சு' இல்லாமல் வாகனங்களை ஓட்டினால் ரூ.500-லிருந்து ரூ.5 ஆயிரமாகவும், போக்குவரத்துக்கு இடையூறாக வாகனங்களை நிறுத்தினால் (நோ பார்க்கிங்) ரூ.100-லிருந்து ரூ.500 ஆகவும், தடை செய்யப்பட்ட சாலையில் (நோ என்ட்ரி) வாகனங்களை ஓட்டினால் ரூ.100-லிருந்து ரூ.500 ஆகவும் அதிகரிக்கப்பட்டது.

இதில் மது போதையில் வாகனங்களை ஓட்டி செல்பவர்களுக்கும், பின்னால் அமர்ந்து செல்வோர்களுக்கும் தலா ரூ.10 ஆயிரம் அபராதம் விதிப்பு அமலுக்கு வந்தது.

வாகன ஓட்டிகள் அதிர்ச்சி

சென்னையில் இந்த புதிய அபராத விதிப்பு 28-ந்தேதிக்கு மேல் நடைமுறைக்கு வரும் என்று போலீஸ் கமிஷனர் சங்கர் ஜிவால் அறிவித்திருந்தார். அதன்படி போக்குவரத்து போலீசார் அபராதங்களை வசூலிக்கும் 'இ-சலான்' எந்திரத்தில் பழைய அபராத தொகையை நீக்கிவிட்டு புதிய அபராத தொகையை பதிவேற்றம் பணி நடைபெற்றது.

இந்த நிலையில் இந்த உத்தரவு 28-ந்தேதிக்கு (நாளை) பின்னர் தானே அமலுக்கு வரும் என்ற அலட்சியத்தில் விதிகளை மீறி வாகனத்தில் சென்ற வாகன ஓட்டிகளுக்கு நேற்று அதிர்ச்சி காத்திருந்தது. ஏனெனில் இந்த புதிய அபராத நடைமுறை (புதிய மோட்டார் வாகன சட்டம்) அமலுக்கு வந்தது. சென்னையின் முக்கிய சந்திப்புகளில் போக்குவரத்து போலீசார் அதிரடி வாகன சோதனையில் ஈடுபட்டனர். சாலை விதிகளை மீறிய வாகன ஓட்டிகளை மடக்கினர்.

போலீசாருடன் வாக்குவாதம்

வாகன சோதனையின்போது 'ஹெல்மெட்' அணியாமல் போலீசாரிடம் சிக்கிய வாகன ஓட்டிகள் வழக்கம் போல் மின்னணு பரிவர்த்தனை மூலம் ரூ.100 அபராதம் செலுத்த முற்பட்டனர். ஆனால் அபராத ரசீது ரூ.1,000 என்று வந்ததால் தலையில் இடி விழுந்தது போன்று அதிர்ந்து போனார்கள்.

இந்த அபராத உயர்வு திடீரென்று அமலுக்கு வந்ததால் போக்குவரத்து போலீசாருக்கும், வாகன ஓட்டிகளுக்கும் சில இடங்களில் வாக்குவாதங்கள் அரங்கேறின.

இன்று முதல் இந்த அபராத நடவடிக்கையை தீவிரமாக கடைபிடிக்க வேண்டும் என்று போக்குவரத்து போலீசாருக்கு உயரதிகாரிகள் உத்தரவிட்டுள்ளனர். அதே நேரத்தில் புதிய அபராத நடவடிக்கைக்கு எதிர்ப்பு தெரிவித்து வாகன ஓட்டிகள் யாரேனும் வாக்குவாதத்தில் ஈடுபட்டால் அவர்களிடம் கனிவாக பேசி சமரசம் செய்து அபராதம் வசூலிக்க வேண்டும் என்றும் போலீஸ் உயரதிகாரிகள் அறிவுரை வழங்கி உள்ளனர்.