இதைப்போல தமிழகம் முழுவதும் சட்டவிரோதமாக அங்கீகாரம் இல்லாமல் 200-க்கும் மேற்பட்ட குடிநீர் நிறுவனங்கள் நிலத்தடி நீரை உறிஞ்சி வருவதாக தமிழக அரசு அறிக்கை தாக்கல் செய்தது.

இதையடுத்து நீதிபதிகள், கடந்த ஜனவரி 9-ந்தேதி நாங்கள் பிறப்பித்த உத்தரவில், சட்டவிரோதமாக செயல்படக்கூடிய குடிநீர் நிறுவனங்களை உடனடியாக இழுத்து மூட உத்தரவிட்டோம். ஆனால், அந்த உத்தரவை அமல்படுத்தாமல், நிறுவனங்களின் பட்டியலை மட்டும் அரசு தாக்கல் செய்துள்ளது. இது கண்டிக்கத்தக்கது என்று கூறினர்.

மேலும், தண்ணீரின் அருமை அதிகாரிகளுக்கு தெரியவில்லை. அவர்கள் அலட்சியமாக செயல்படுகின்றனர். சட்டவிரோதமாக நிலத்தடி நீரை உறிஞ்சும் நிறுவனங்களை இழுத்து மூடாத மாவட்ட கலெக்டர்களுக்கு தலா ரூ.1 லட்சம் அபராதம் விதித்தால் என்ன? நிலத்தடி நீர் எடுக்கும் நிறுவனம் தொடர்பாக அரசு ஒரு கொள்கை முடிவு எடுக்க வேண்டும். ஆயிரம் பேர் நிலத்தடி நீரை எடுக்க அனுமதிக்கேட்டால், அரசு அனுமதி வழங்கிடுமா? என்று சரமாரியாக அரசுக்கு தரப்புக்கு கேள்வி எழுப்பினர்.

பின்னர், இந்த வழக்கை வருகிற 26-ந்தேதிக்கு தள்ளிவைக்கிறோம். அதற்குள் சட்டவிரோதமாக செயல்படக்கூடிய குடிநீர் நிறுவனங்கள் மீது நடவடிக்கை எடுத்து அறிக்கையை தாக்கல் செய்யவேண்டும். இதற்காக மாவட்ட ரீதியாக எடுத்த நடவடிக்கையை ஆய்வு செய்யப்படும். இந்த ஐகோர்ட்டு உத்தரவை அமல்படுத்தாத மாவட்ட கலெக்டர்களுக்கு பெரும் தொகை அபராதம் விதிக்கப்படும். அந்த தொகையை அவர்கள் சொந்த பணத்தில் இருந்து செலுத்த வேண்டியது வரும் என்று எச்சரித்து நீதிபதிகள் உத்தரவிட்டனர்.