தஞ்சை மாவட்டம் ஒரத்தநாடு தாலுகா திருவோணத்தை அடுத்துள்ள வீரடிபட்டி வீரப்பையா சுவாமி கோவில் அருகில் ஒரு தனி நபர் கட்டிடத்தில் புதிதாக அரசு மதுக்கடை திறக்க அனுமதி அளிக்கப்பட்டு உள்ளது.இதைத்தொடர்ந்து இந்த இடத்தில் மதுக்கடை திறப்பதற்கான முன்னேற்பாடு பணிகள் தொடங்கியது. இதை அறிந்த அப்பகுதியை சேர்ந்த பொதுமக்கள் நேற்று காலை அங்கு திரண்டனர். இவர்கள் கோவில், பள்ளிக்கூடம், குடியிருப்புகள் உள்ள இந்த பகுதியில் மதுக்கடை திறக்கப்பட்டால் இங்கு வசிக்கும் பெண்கள் மற்றும் பொது மக்களுக்கு இடையூறு ஏற்படும் எனக்கூறி இங்கு புதிதாக மதுக்கடை திறக்க கூடாது என வலியுறுத்தினர். மேலும் மதுக்கடை திறக்க எதிர்ப்பு தெரிவித்து சாலை மறியலில் ஈடுபட உள்ளதாகவும் கிராம மக்கள் தெரிவித்தனர்.