சென்னையில் வசித்து வரும் கேரள மக்கள் சார்பில் தி மலையாளி கிளப்' எனப்படும் அமைப்பு சென்னை சேத்துப்பட்டு பகுதியில் 125 ஆண்டுகளாக செயல்பட்டு வருகிறது. இந்த கிளப் சார்பில் அதன் கட்டிட வளாகத்தில் முதன்முறையாக நேற்று பொங்கல் விழா கொண்டாடப்பட்டது.

தமிழக கலாசாரத்தை பின்பற்றி நடைபெற்ற விழாவையொட்டி, அரங்கம் முழுவதும் கரும்புகளால் அலங்கரிக்கப்பட்டிருந்தது. வர்ணம் தீட்டப்பட்ட பொங்கல் பானைகள் வைக்கப்பட்டிருந்தன. மாட்டு பொங்கலின் போது மாடுகளுக்கு பூஜை செய்வதை நினைவு கூறும் வகையில் அங்கு அலங்கரித்து வைக்கப்பட்டிருந்த மாட்டின் சிலைக்கு பூஜைகள் செய்யப்பட்டன. விழாவில் கலந்து கொண்டவர்கள் பொங்கலோ பொங்கல்' என உற்சாகமாக கோஷமிட்டு வாழ்த்துகளை தெரிவித்துக்கொண்டனர்.இதன்பின்பு கலைநிகழ்ச்சிகள் நடந்தன. இந்த விழாவுக்கு கிளப் தலைவர் கோகுலம் கோபால் தலைமை தாங்கினார். செயலாளர் கணேசன், பொருளாளர் மனோகரன் ஆகியோர் முன்னிலை வகித்தனர்.