தனி இடஒதுக்கீட்டுக்கு பதிலாக வன்னியர்களுக்கு 20 சதவீத உள்ஒதுக்கீடு கேட்டு தொடர்ந்து வலியுறுத்தப்பட்டு வருகிறது. அதன் பின்னர் பா.ம.க. நிறுவனர் தலைவர் டாக்டர் ராமதாசிடமும் அமைச்சர்கள் பி.தங்கமணி, எஸ்.பி.வேலுமணி உள்பட கட்சி நிர்வாகிகள் சிலர் சென்று பேச்சுவார்த்தை நடத்தினர். அதில் சுமுக உடன்பாடு ஏற்பட்டது.

இந்தநிலையில் 3-ந் தேதி (நேற்று) இடஒதுக்கீடு பற்றி பேச்சுவார்த்தை நடத்த இருப்பதாக அக்கட்சி தரப்பில் கூறப்பட்டது. இந்தக் கூட்டம் சென்னை கிரீன்வேஸ் சாலையில் உள்ள மின்சாரத் துறை அமைச்சர் பி.தங்கமணி வீட்டில் நேற்று நடைபெற்றது. இந்த கூட்டத்தில் அமைச்சர்கள் பி.தங்கமணி, எஸ்.பி.வேலுமணி ஆகியோர் பங்கேற்றனர். அ.தி.மு.க.வின் துணை ஒருங்கிணைப்பாளர்களான கே.பி.முனுசாமி, வைத்திலிங்கம் ஆகியோரும் கலந்து கொண்டனர்.

பா.ம.க. தரப்பில் அக்கட்சியின் தலைவர் ஜி.கே.மணி மற்றும் நிர்வாகிகள் ஏ.கே.மூர்த்தி, தீரன், வேலு, வக்கீல் பாலு, வன்னியர் சங்கத்தைச் சேர்ந்த அருள்மொழி ஆகியோர் பங்கேற்றனர். நேற்று காலை 10.45 மணிக்கு தொடங்கிய இந்தக் கூட்டம் பிற்பகல் 1.45 மணிவரை 3 மணி நேரம் நீடித்தது.

இந்த கூட்டத்தில் பல்வேறு முடிவுகள் எடுக்கப்பட்டுள்ளன என்று கட்சிகள் வட்டாரத்தில் தெரிவிக்கப்பட்டது. வன்னியர்களுக்கு 20 சதவீத உள்ஒதுக்கீட்டை தேர்தல் அறிக்கையில் வெளியிட இருப்பதாக அ.தி.மு.க. உறுதி அளித்ததாகத் தெரிகிறது. தற்போது நடக்கும் சட்டமன்ற கூட்டத் தொடரிலோ அல்லது 22-ந் தேதிக்கு மேல் கூட இருக்கும் பட்ஜெட் கூட்டத் தொடரிலோ, இடஒதுக்கீடு தொடர்பாக அரசு ஏதாவது ஒரு வகையில் உறுதி அளிக்கும் என்றும் கூறப்பட்டிருக்கிறது.

மேலும், பா.ம.க.வுக்கு 31 தொகுதிகளை அளிக்க தயார் என்று அ.தி.மு.க. தரப்பில் கூறப்பட்டது. இதில் 29 தொகுதிகள் வட மாவட்டங்களிலும் 2 தொகுதிகள் தென்மாவட்டங்களிலும் தரப்படுவதாக அ.தி.மு.க. தரப்பில் தெரிவிக்கப்பட்டது. ஆனால் தென்மாவட்டங்களில் தங்களுக்கு தொகுதிகள் தேவையில்லை என்றும் அதை வடமாவட்டங்களில் தர வேண்டும் என்றும் பா.ம.க. தரப்பில் தெரிவிக்கப்பட்டதாகக் கூறப்படுகிறது. இதில் அ.தி.மு.க. தரப்பில் உறுதி அளிக்கப்படவில்லை என்றும் தெரிகிறது

எனவே இதில் முடிவு எட்டப்படாமல் நேற்றைய கூட்டம் முடிவடைந்தது. அதைத் தொடர்ந்து அமைச்சர்கள் மற்றும் அ.தி.மு.க. நிர்வாகிகள் உடனடியாக முதல்-அமைச்சர் எடப்பாடி பழனிசாமியை சந்திக்க அவரது வீட்டுக்குச் சென்றனர். அங்கு முதல்-அமைச்சருடன் அவர்கள் இதுபற்றி ஆலோசனை மேற்கொண்டனர்.

பா.ம.க. நிர்வாகிகளும் தங்களின் கட்சி நிறுவனத் தலைவர் டாக்டர் ராமதாசை சந்தித்து ஆலோசனை செய்தனர்.