எதிர்க்கட்சி தலைவர் மு.க.ஸ்டாலின் இந்த ஆட்சியிலே என்ன திட்டம் மக்களுக்கு கிடைத்திருக்கின்றது, என்ன நன்மை கிடைத்திருக்கின்றது என்று அடிக்கடி புலம்பிக் கொண்டிருக்கிறார். நம்முடைய கட்சி பற்றியும், ஆட்சி பற்றியும் விமர்சனம் செய்து கொண்டிருக்கிறார். அதேபோல, மாற்றுக்கட்சியை சேர்ந்த தலைவர்களும் விமர்சனம் செய்கிறார்கள்.

மாற்றுக் கட்சியினர் காழ்ப்புணர்ச்சியின் காரணமாக ஆதாரம் இல்லாத குறைகளை கூறிக்கொண்டிருக்கிறார்கள். குறை கூறுபவர்கள் குறை கூறிக்கொண்டு தான் இருப்பார்கள். குறைகளுக்கு அவர்களால் தீர்வு சொல்ல தெரியாது.

எதிர்க்கட்சி தலைவர் நம் ஆட்சியைப்பற்றி விமர்சனம் செய்துகொண்டே இருக்கிறார். எப்போது பார்த்தாலும், நம்முடைய ஆட்சியை குறைசொல்வது தான் அவரது வழக்கம். அவர் எப்போது பார்த்தாலும் ஒரே வசனத்தை பேசுவார், அதாவது இது குதிரை பேர அரசு என்று சொல்வார். யாரை சொல்கிறார் என்று நமக்கு தெரியவில்லை.

ஏனென்றால், விரைவிலே தீர்ப்பு வருவது உங்கள் அத்தனை பேருக்கும் தெரியும். அப்போது யாருடைய ஆட்சியில் குதிரை பேரம் நடந்தது என்று நாட்டு மக்களுக்கு தெரியும். இவ்வாறு அவர் பேசினார்.

விழாவில் துணை முதல்- அமைச்சர் ஓ.பன்னீர்செல்வம் கலந்துகொண்டு பேசியதாவது:-

ஒரு காலத்தில் எம்.ஜி.ஆரை கட்சியில் இருந்து நீக்கியவர்கள் தற்போது மக்கள் மன்றத்தில் மூக்கு உடைபட்டு, செய்த பாவம் தீராமல் வாழ்ந்து வருகிறார்கள்.

2016-ம் ஆண்டு தேர்தலில் அ.தி.மு.க.வை வெற்றிபெற செய்து, 35 ஆண்டுகளுக்கு பிறகு ஆண்ட கட்சி மீண்டும் ஆட்சி செய்கிற உரிமையை ஜெயலலிதா பெற்று தந்தார். எங்களை தேர்தலில் நிறுத்தி எங்களுக்காக மக்களிடம் ஜெயலலிதா வாக்கு கேட்டார். அதனால் தான் நாங்கள் வெற்றிபெற்று சட்டமன்ற உறுப்பினர்களாக இருக்கிறோம். இதேபோல் நாங்களும் தொகுதிக்கு சென்று வாக்கு கேட்டபோது, ஏற்கனவே செய்த திட்டங்களை கூறி கேட்கவில்லை. ஜெயலலிதா மீண்டும் முதல்-அமைச்சராக வர வேண்டும் என்று தான் வாக்கு கேட்டோம்.

ஆனால் தற்போது ஜெயலலிதா இல்லை. முதல்-அமைச்சர் எடப்பாடி பழனிசாமி ஜெயலலிதாவின் வழியில் ஆட்சி நடத்தி வருகிறார். ஜெயலலிதா, எனக்கு பிறகும் இந்த இயக்கம் இன்னும் 100 ஆண்டுகள் இருக்கும் என்றார். அவர் சொன்னதை போல இந்த இயக்கம் இன்னும் பல ஆண்டுகள் இருக்கும். இவ்வாறு அவர் பேசினார்.