மதுரை பனகல் சாலையில் அரசு ஆஸ்பத்திரி எதிரே உள்ள சாலையோரத்தில் 60 வயதான ஒருவர் இறந்து கிடந்தார். இதுபற்றி அறிந்த போலீசார் விரைந்து சென்று விசாரணை நடத்தினார்கள். இறந்து கிடந்தவர் அருகே 2 பைகள் இருந்தன. அவற்றை போலீசார் சோதனை செய்த போது, அதில் 2 வங்கி பாஸ் புத்தகங்கள் இருந்தன. அதன் மூலம் அவர், மதுரை நாகமலை புதுக்கோட்டையை சேர்ந்த ராதா (வயது 60) என்பது தெரியவந்தது. மேலும் அவர் மதுரை காமராஜர் பல்கலைக்கழக இயற்பியல் துறை ஆய்வகத்தில் வேலை பார்த்து, கடந்த 3 ஆண்டுகளுக்கு முன்பு ஓய்வு பெற்றவர் என்பதும் தெரியவந்தது.

மேலும் அவரது கூட்டுறவு வங்கிக்கணக்கில் 20 லட்சத்து 5 ஆயிரத்து 869 ரூபாய் வைப்பு தொகையாக இருப்பது கண்டுபிடிக்கப்பட்டது. இது தவிர அவர் கடந்த 2019-ம் ஆண்டு அவரது மற்றொரு வங்கி கணக்கில் இருந்து ரூ.36 லட்சம் எடுத்ததும் தெரியவந்தது. எனவே வங்கி பாஸ் புத்தகத்தில் உள்ள முகவரியை வைத்து போலீசார் அவரது உறவினர்களிடம் விசாரித்தனர். இறந்த ராதாவுக்கு திருமணமாகவில்லை. சமீபகாலமாக மனநிலை பாதிக்கப்பட்ட நிலையில் இருந்துள்ளார்.