ராமநாதபுரம் மாவட்டம், கமுதியில் பிரசித்தி பெற்ற முஸாபர் அவுலியா தர்காவில் சந்தனக்கூடு திருவிழா ஆண்டுதோறும் நடைபெறுவது வழக்கம். அதன்படி இந்த ஆண்டு சந்தனக்கூடு திருவிழா கடந்த 18-ந் தேதி கொடியேற்றத்துடன் தொடங்கியது. பின்னர் நேற்று முன்தினம் நள்ளிரவு சந்தனக்கூடு திருவிழா நடைபெற்றது. முன்னதாக கமுதி-சுந்தரபுரம் தைக்கா வீட்டில் இருந்து இந்த சந்தனக்கூடு ஊர்வலம் புறப்பட்டது. தர்கா நிர்வாக தலைவரும், பேரூராட்சி தலைவருமான அப்துல் வஹாப் சகாராணி, மலர்களால் அலங்கரிக்கப்பட்ட சந்தனக் குடத்தை, மின் விளக்குகளால் அலங்கரித்த சந்தனக் கூட்டில் வைத்து ஊர்வலத்தை தொடங்கி வைத்தார்.