13 மணி 35 நிமிட நேரம்

இலங்கை தலைமன்னார் கடற்கரையில் இருந்து நேற்று அதிகாலை 4.15 மணி அளவில் ஆசிரியை சியாமளாஹோலி கடலில் நீந்த தொடங்கினார். நேற்று மாலை 5.50 மணி அளவில் தனுஷ்கோடி அரிச்சல்முனை கடற்கரையை வந்தடைந்தார்.

இவர் தலைமன்னாரில் இருந்து தனுஷ்கோடி வரையிலான 28.5 கிலோ மீட்டர் தூரத்தை 13 மணி 35 நிமிட நேரத்தில் நீந்தி கடந்து சாதனை படைத்துள்ளார்.

இதுகுறித்து சியாமளாஹோலி கூறியதாவது:-

இந்தியாவில் பல நதிகளில் நீந்தி உள்ளேன். கடலில் நீந்தியது இதுதான் முதல் முறை. கடலில் நீந்த வேண்டும் என்பது எனது லட்சியம், கனவாக இருந்தது. அதற்காக கடந்த ஆண்டு தலைமன்னார்-தனுஷ்கோடி இடையே கடலில் நீந்த வேண்டும் என திட்டமிட்டு இருந்தேன்.

கொரோனா காரணமாக அந்த திட்டம் அப்போது கைவிடப்பட்டது.

மிகுந்த மகிழ்ச்சி

தற்போது இந்த சாதனையை படைக்க இந்திய அரசும், இலங்கை அரசும் அனுமதி வழங்கின. இலங்கை கடல் பகுதியில் கடல் நீரோட்டம் நீந்துவதற்கு சாதகமாக இருந்தது. அதனால் வேகமாக நீந்த முடிந்தது. ஆனால், இந்திய கடல் எல்லையில் இருந்து, தனுஷ்கோடி அரிச்சல் முனை வரையிலும் கடல் நீரோட்டத்தின் வேகம் மிக அதிகமாக இருந்ததால் நீந்துவதற்கு மிகவும் சிரமப்பட்டேன். கஷ்டமாகவும் இருந்தது. 28.5 கிலோ மீட்டர் தூரத்தை 13 மணி நேரம் 35 நிமிடத்தில் கடந்தது எனக்கு மிகுந்த மகிழ்ச்சியாக உள்ளது.

அடுத்தகட்டமாக ஆங்கில கால்வாயில் நீந்த வேண்டும் என்பது எனது இலக்கு.

இவ்வாறு அவர் கூறினார்.

புதிய சாதனை படைத்த ஆசிரியை சியாமளாஹோலிக்கு பாராட்டு குவிந்து வருகிறது.