சென்னை,

தமிழக அரசு தெர்மல் ஸ்கேனரை அதிக விலை கொடுத்து வாங்கி இருப்பதாகவும், அவ்வாறு வாங்கப்பட்ட ஸ்கேனர்களின் தரம் மிக மோசமாக இருப்பதாகவும் திமுக தலைவர் ஸ்டாலின் குற்றம் சாட்டினார். தெர்மல் ஸ்கேனர் கொள்முதல் தொடர்பான வெள்ளை அறிக்கையை தமிழக அரசு வெளியிட வேண்டும் என அவர் வலியுறுத்தினார்.

இதற்கு மறுப்பு தெரிவித்துள்ள அமைச்சர் ஜெயக்குமார், தெர்மல் ஸ்கேனரை கூடுதல் விலைக்கு வாங்கியதாக சென்னை மாநகராட்சி மீது திமுக தலைவர் ஸ்டாலின் பழி போடுவதாக குறிப்பிட்டார். தெர்மல் ஸ்கேனர் கருவிகள் தலா ரூ.1,765+18% ஜிஎஸ்டி வரியுடன் மட்டுமே வாங்கப்பட்டது என்று அவர் தெரிவித்துள்ளார்.

மேலும், கொரோனா தடுப்பு நடவடிக்கையில் தமிழக அரசு மிக சிறப்பாக செயல்பட்டு வருவதாக அமைச்சர் ஜெயக்குமார் கூறியுள்ளார். உலகிலேயே முதன் முறையாக வீடுகள் தோறும் கொரோனா அறிகுறிகள் உள்ளனவா என கண்டறியும் திட்டத்தை சென்னை மாநகராட்சி தான் செயல்படுத்தி வருகிறது என்று அவர் தெரிவித்துள்ளார்.