எனக்கு இந்தி தெரியாததால், மத்திய தொழில் பாதுகாப்பு படை அதிகாரியிடம், தமிழ் அல்லது ஆங்கிலத்தில் பேசுமாறு விமான நிலையத்தில் வைத்து கூறினேன். அதற்கு அவர் நீங்கள் இந்தியர் தானே? என்று கேட்டார். இந்தி தெரிந்தால்தான் இந்தியர் என்பது எப்போதில் இருந்து முடிவு செய்யப்பட்டது என்பதை நான் தெரிந்துகொள்ள விரும்புகிறேன். இந்தி திணிப்பு.

இவ்வாறு அவர் கூறியுள்ளார்.

கனிமொழியிடம் இந்தியரா? என்று மத்திய தொழில் பாதுகாப்பு படை பெண் அதிகாரி கேட்டது சர்ச்சையை ஏற்படுத்தியது. இதையடுத்து பேஸ்புக், டுவிட்டர், வாட்ஸ்-அப் உள்பட சமூக ஊடகங்களில் குறிப்பிட்ட அந்த அதிகாரிக்கு எதிராக கண்டன குரல்கள் பதிவாகிய வண்ணம் இருந்தன. இந்தநிலையில், டெல்லி விமான நிலையத்தில் கனிமொழி இறங்கியபோது, சென்னை விமான நிலையத்தில் நடந்த சம்பவத்துக்கு மத்திய தொழில் பாதுகாப்பு படை சார்பில் வருத்தம் தெரிவிக்கப்பட்டது. மேலும் விசாரணை நடத்தவும் உத்தரவிடப்பட்டுள்ளது.

இதுகுறித்து மத்திய தொழில் பாதுகாப்பு படை தனது அதிகாரபூர்வ டுவிட்டர் பதிவில், உங்களுடைய விரும்பத்தகாத அனுபவத்துக்காக வருத்தம் தெரிவிக்கிறோம். இந்த விவகாரத்தில் சரியான நடவடிக்கை எடுக்கப்படும். இதுதொடர்பாக விசாரணைக்கு உத்தரவிடப்பட்டுள்ளது. குறிப்பிட்ட எந்தவொரு மொழியையும் வலியுறுத்துவது மத்திய தொழில் பாதுகாப்பு படையின் கொள்கை அல்ல என்று கூறப்பட்டுள்ளது.