அனைத்து கட்சிகளின் கோரிக்கையை சுப்ரீம் கோர்ட்டில் அழுத்தமாக பதிவு செய்ய தமிழக அரசு வேண்டும் என்றே தவறிவிட்டது; வைகோ குற்றச்சாட்டு

தூத்துக்குடி நாசகார ஸ்டெர்லைட் நச்சு ஆலையை எதிர்த்து, 1996-ல் இருந்து போராடி வருகின்றேன். சென்னை ஐகோர்ட்டில் 1997-ல் ரிட்' மனு தாக்கல் செய்தேன். அதில் நானே வாதாடினேன். 2010 செப்டம்பர் 28-ந்தேதியன்று, ஆலையை மூடுமாறு தீர்ப்பு கிடைத்தது. அதன்பிறகு, சுப்ரீம் கோர்ட்டில் ஸ்டெர்லைட் நிறுவனம் தடை ஆணை பெற்றது.2013 ஏப்ரல் 2-ந்தேதியன்று, ஸ்டெர்லைட் ஆலையை இயக்கலாம் என சுப்ரீம் கோர்ட்டு தீர்ப்பு கொடுத்தது. அதன்பிறகு, நான் தீர்ப்பாயத்திற்கு சென்று வழக்குத்தொடுத்தேன். மீண்டும இன்னொரு ரிட்' மனு, சுப்ரீம் கோர்ட்டில் தாக்கல் செய்தேன். அந்த ரிட்' மனு, இன்னமும் நிலுவையில் இருக்கின்றது. இதற்கிடையில் நடைபெற்ற போராட்டத்தில்தான் 13 பேர் சுட்டுக் கொல்லப்பட்டார்கள். தமிழ்நாடு அரசு, முழுக்க முழுக்க ஸ்டெர்லைட் நிறுவனத்துக்கு ஏஜெண்டாகவே வேலை செய்து வந்துள்ளது.