அரங்குளநாதர் கோவில்
புதுக்கோட்டை மாவட்டம், திருவரங்குளத்தில் வரலாற்று புகழ்மிக்க சோழர் காலத்து பழம்பெருமை வாய்ந்த சுயம்புலிங்க அரங்குளநாதர் சமேத பெரியநாயகி அம்பாள் கோவில் வைகாசி விசாக திருவிழா கடந்த மாதம் 24-ந் தேதி கொடியேற்றத்துடன் தொடங்கியது. தினமும் காலை இரவு வேளைகளில் காமதேனு, அன்னம், சிம்மம் வெள்ளி குதிரை, வெட்டுவான் குதிரை வாகனம் உள்ளிட்ட பல்வேறு வாகனங்களில் சுவாமி-அம்பாள் வீதி உலா நடைபெற்றது.
தேரோட்டம்
இதையடுத்து திருவிழாவின் முக்கிய நிகழ்ச்சியான தேரோட்டம் நேற்று நடைபெற்றது. இதையொட்டி சுவாமி-அம்பாளுக்கு சிறப்பு அபிஷேகம், ஆராதனை நடைபெற்றது. பின்னர் சுவாமி-அம்பாள் பட்டாடை உடுத்தி, தங்க ஆபரணங்கள் சாற்றப்பட்டு சிறப்பு அலங்காரத்தில் திருத்தேர்களில் எழுந்தருளினர். பின்னர் காலை 10 மணிக்கு மேள தாளம் முழங்க திரளான பக்தர்கள் சிவ, சிவ... ஹர, ஹர... கோஷத்துடன் 2 தேர்களை வடம் பிடித்து இழுத்தனர்.
அப்போது சிவ பக்தர்கள் சிவபுராணம் பாடியவாறு தேர் முன்பாக சென்றனர். தேர் முக்கிய வீதிகள் வழியாக அசைந்தாடி வந்து கோவில் நிலையை 11.15 மணிக்கு வந்தடைந்தது. இதில் பக்தர்கள் ஆங்காங்கே கூடி நின்று சுவாமி-அம்பாளுக்கு அர்ச்சனை செய்து வழிபட்டனர். இதில் தேவஸ்தான அலுவலர்கள், திருப்பணி கமிட்டியினர், மண்டகபடிதாரர்கள், விழா குழுவினர், உள்ளாட்சி பிரதிநிதிகள் மற்றும் திரளான பொதுமக்கள் கலந்து கொண்டு சாமி தரிசனம் செய்தனர்.