இந்தநிலையில் தமிழகம் முழுவதும் இன்று (திங்கட்கிழமை) முதல் ஒரு வார காலத்துக்கு தளர்வில்லாத முழு ஊரடங்கு கடைபிடிக்கப்படுகிறது. இந்து சமய அறநிலையத்துறை அத்தியாவசிய சேவை பிரிவில் வராது என்பதால், கோவில்களில் இருந்து ஆஸ்பத்திரிகளுக்கு உணவு கொண்டு செல்லப்படுவதில் சிக்கல் ஏற்பட்டு உள்ளது. எனவே இந்த பணிகளில் தொய்வு ஏற்பட்டு விடக் கூடாது என்பதால், தன்னார்வலர்கள் மூலம் இப்பணியை மேற்கொள்ள இந்து சமய அறநிலையத்துறை திட்டமிட்டு உள்ளது.

இதுகுறித்து இந்து சமய அறநிலையத்துறை கமிஷனர் ஜெ.குமரகுருபரன் தினத்தந்தி நிருபரிடம் கூறியதாவது:-

அரசு ஆஸ்பத்திரிகளுக்கு...

கொரோனா பரவல் அதிகம் உள்ள சூழலில் அரசு ஆஸ்பத்திரிகளில் சிகிச்சை பெறும் நோயாளிகளை கவனித்து வரும் உறவினர்கள், நண்பர்கள் உள்ளிட்டோருக்கு கோவில்களில் இருந்து தினமும் மதிய உணவு வழங்கப்பட்டு வருகிறது. அந்தந்த கோவில்களின் நிதி வருவாய் மற்றும் சமையலறை கூட வசதி உள்ளிட்டவற்றின் அடிப்படையில் உணவு பொட்டலங்கள் தயாரிக்கப்படுகின்றன. குறிப்பாக சென்னை மயிலாப்பூர் கபாலீசுவரர் கோவிலில் தினந்தோறும் 4 ஆயிரம் உணவு பொட்டலங்கள் தயாரிக்கப்பட்டு, சென்னையில் உள்ள அரசு ஆஸ்பத்திரிகளுக்கும், பழனி தண்டாயுதபாணி முருகன் கோவிலில் 4 ஆயிரம் உணவு பொட்டலங்கள் தயாரிக்கப்பட்டு திண்டுக்கல் மாவட்டத்தில் உள்ள அரசு ஆஸ்பத்திரிகளுக்கும் அனுப்பப்பட்டு வருகின்றன. இதற்காக வாகன வசதிகள் ஏற்பாடு செய்து இந்த

பணிகளை நாங்களே மேற்கொண்டு வந்தோம்.

தன்னார்வலர்களுக்கு அழைப்பு

இந்தநிலையில் இன்று முதல் தளர்வில்லா முழு ஊரடங்கு அமலுக்கு வருவதால், உணவு சப்ளை செய்யும் பணியில் தன்னார்வலர்களை ஈடுபடுத்திட முடிவு செய்துள்ளோம். எனவே வாகன வசதி, போதுமான ஆட்கள் வசதி உள்ளிட்டவை கொண்ட தன்னார்வலர்கள் தாமாகவே முன்வந்து இந்த சேவையில் தங்களை ஈடுபடுத்தி கொள்ளலாம். இதில் ஆர்வமுள்ள தன்னார்வலர்கள் அந்தந்த மண்டல இந்து சமய அறநிலையத்துறை இணை கமிஷனர்களை அணுகலாம்.

இவ்வாறு அவர் கூறினார்.