* அமெரிக்காவின் அலாஸ்கா மாகாணத்தில் நேற்று சக்தி வாய்ந்த நிலநடுக்கம் ஏற்பட்டது. ரிக்டர் அளவுகோலில் 6.1 புள்ளிகளாக பதிவான இந்த நிலநடுக்கத்தால் ஏற்பட்ட சேத விவரங்கள் குறித்து தகவல்கள் இல்லை.
* ஆப்கானிஸ்தான் தலைநகர் காபூலில் நடந்த குண்டுவெடிப்பில் போலீஸ் அதிகாரி ஒருவர் சம்பவ இடத்திலேயே பலியானார். மேலும் 2 போலீசார் படுகாயமடைந்தனர்.
* கொரோனா தொற்றுக்கு ஆளான பொலிவியாவின் இடைக்கால அதிபர் ஜூனைன் அனெஸ் அதிலிருந்து மீண்டு குணமடைந்து விட்டார். அதனை தொடர்ந்து அவர் வழக்கமான பணிகளுக்கு திரும்பியுள்ளார்.
* மேற்கு ஆப்பிரிக்க நாடான மாலியில் ஏற்பட்டுள்ள அரசியல் நெருக்கடி குறித்து ஐ.நா. பாதுகாப்பு கவுன்சில் கவலை தெரிவித்துள்ளது. மேலும் பேச்சு வார்த்தையின் மூலமாக பதற்றத்தை தணிக்க நாட்டின் அரசியல் கட்சிகளை வலியுறுத்தி உள்ளது.
* ஜிம்பாப்வே நாட்டில் நாடாளுமன்ற உறுப்பினர்கள் 2 பேருக்கு கொரோனா வைரஸ் தொற்று உறுதி செய்யப்பட்டதை தொடர்ந்து, நாடாளுமன்ற நடவடிக்கைகள் ஒத்தி வைக்கப்பட்டுள்ளன.
* ரஷிய அதிபர் புதின் துருக்கி அதிபர் எர்டோகன் தொலைபேசி வாயிலாக ஆலோசனை நடத்தினர். அஜர்பைஜான் மற்றும் அர்மேனியா இடையிலான எல்லைப் பிரச்சினையை சுமுகமாக தீர்ப்பது குறித்து இருவரும் ஆலோசனை நடத்தினர்.