இலங்கை அதிபர் சிறிசேனாவுக்கும், பிரதமராக பதவி வகித்து வந்த ரனில் விக்ரமசிங்கேவுக்கும் இடையே கடந்த சில மாதங்களாக அதிகார போட்டி நிலவி வந்தது. இந்த மோதல் தீவிரமடைந்த நிலையில், அதிபர் சிறிசேனா, பிரதமர் பதவியில் இருந்து ரனில் விக்ரமசிங்கேயை கடந்த வெள்ளிக்கிழமை இரவு அதிரடியாக நீக்கினார். உடனடியாக முன்னாள் அதிபர் ராஜபக்சேயை பிரதமராக நியமித்து, பதவிப் பிரமாணமும் செய்து வைத்தார்.

சர்வதேச அரங்கில் சலசலப்பை ஏற்படுத்திய இந்த விவகாரத்தால், தற்போது இலங்கையில் அரசியல் நெருக்கடி முற்றியுள்ளது. இலங்கை பிரதமர் பொறுப்பில் நீடிப்பதாக ரனில் விக்ரமசிங்கே கூறி வருகிறார். ரனிலுக்கு ஆதரவாக இலங்கை நாடாளுமன்ற சபாநாயகரும் அதிபர் சிறிசேனாவுக்கு கடிதம் எழுதியுள்ளார். நாடாளுமன்றத்தில், ராஜபக்சே பெரும்பான்மையை காட்டும் வரை, ரனில் பிரதமராக நீடிப்பார் என்று சபாநாயகர் கரு ஜெயசூரியா தெரிவித்துள்ளார். இதற்கிடையில், இலங்கை பாராளுமன்றம் நவம்பர் 16 ஆம் தேதி வரை தற்காலிகமாக முடக்கி வைக்கப்பட்டுள்ளது.