அமெரிக்காவில் கருப்பு இனத்தை சேர்ந்த ஜார்ஜ் பிளாய்ட் (வயது 46) என்பவர், மினியாபொலிஸ் நகரில் போலீசார் பிடியில் கடந்த 25-ந் தேதி கொலை செய்யப்பட்டது, பெரும் கொந்தளிப்பை ஏற்படுத்தி உள்ளது. இந்த படுகொலையில் நீதி கோரி கருப்பர் இன மக்கள் அமெரிக்க நகரங்களில் ஊரடங்குகளையும் பொருட்படுத்தாமல் வீதிகளில் இறங்கி தொடர்ந்து 8-வது நாளாக போராடி வருகின்றனர்.

இப்போது வன்முறையை ஒடுக்க ராணுவம் களமிறக்கப்படும் என ஜனாதிபதி டிரம்ப் அறிவித்த நிலையில், ஜார்ஜ் பிளாய்ட் குடும்பத்தினர், முன்னாள் அமெரிக்க ஜனாதிபதி ஒபாமா உள்ளிட்டோர் வன்முறையை கைவிடுமாறு போராட்டக்காரர்களுக்கு வேண்டுகோள் விடுத்தனர். இப்போது வன்முறை குறைந்து விட்டதாக அமெரிக்காவில் இருந்து வரும் தகவல்கள் கூறுகின்றன.