லண்டன்,

இங்கிலாந்து நாடாளுமன்றத்தில் தொழிலாளர் கட்சி சார்பில் நீண்ட காலமாக எம்.பி.யாக இருப்பவர் கெயித் வாஸ் (வயது 62). இந்திய வம்சாவளியை சேர்ந்தவரான இவர், ஆண் விபசாரிகளுக்காக போதைப்பொருள் வாங்க விருப்பம் தெரிவித்ததாகவும், ஆண் விபசாரிகளுடன் தொடர்பில் இருந்ததாகவும் கடந்த 2016-ம் ஆண்டு புகார் எழுந்தது.

இதைத்தொடர்ந்து அவர் மீது நாடாளுமன்ற நிலைக்குழு விசாரணை நடத்தியது. இந்த விசாரணையில், கெயித் வாஸ் மீதான குற்றச்சாட்டு நிரூபிக்கப்பட்டது. எனவே அவரை 6 மாதம் இடைநீக்கம் செய்ய நிலைக்குழு பரிந்துரைத்தது.

அதன்படி கெயித் வாசை இடைநீக்கம் செய்வதற்கான தீர்மானம் நாடாளுமன்றத்தில் தாக்கல் செய்யப்பட்டது. இது ஒரு மனதாக நிறைவேற்றப்பட்டதை தொடர்ந்து, கெயித் வாஸ் அடுத்த 6 மாதங்களுக்கு நாடாளுமன்றத்தில் இருந்து இடைநீக்கம் செய்யப்பட்டு உள்ளார்.

இங்கிலாந்தில் அடுத்த மாதம் நடைபெறும் நாடாளுமன்ற தேர்தலில் கெயித் வாஸ் போட்டியிட்டு வெற்றி பெற்றாலும், அவர் முழு தண்டனை காலத்தையும் அனுபவிக்க வேண்டும் என நிலைக்குழு தலைவர் கதே கிரீன் கூறியுள்ளார்.