இந்த சூழலில் ஈரான் அதிபர் தேர்தலையொட்டி அணுசக்தி ஒப்பந்த பேச்சுவார்த்தை தற்காலிகமாக நிறுத்தப்பட்டது. புதிய அதிபர் இப்ராகிம் ரைசி ஆகஸ்டு மாதம் பதவியேற்ற பின்னரே, நிறுத்தி வைக்கப்பட்ட பேச்சுவார்த்தை மீண்டும் தொடங்கும் எனவும் ஈரான் அறிவித்தது. இந்த நிலையில் மேற்கத்திய நாடுகளின் அழுத்தம் இல்லாமல் அணுசக்தி ஒப்பந்த பேச்சுவார்த்தை நடக்க வேண்டும் என ஈரான் அதிபர் இப்ராகிம் ரைசி தெரிவித்துள்ளார்.

இது குறித்து அவர் கூறுகையில் அணுசக்தி ஒப்பந்த பேச்சுவார்த்தை நிச்சயமாக எங்கள் அரசாங்கத்திற்கு மையமாக இருக்கும் என்று நான் முன்பே கூறினேன். அதன்படி அணுசக்தி ஒப்பந்த பேச்சுவார்த்தையில் ஈரான் அரசு கவனம் செலுத்தும். ஆனால் அதில் ஈரானுக்கு எதிரான புதிய தடைகள் மற்றும் மேற்கத்திய நாடுகளின் அழுத்தங்கள் இருக்கக் கூடாது. அவர்களின் (மேற்கத்திய நாடுகள்) வற்புறுத்தலின் கீழ் தொடர்ந்தால் இந்த பேச்சுவார்த்தை வெற்றி பெறாது என கூறினார்.