மோதல் போக்கை கடைப்பிடித்து இஸ்ரேல், அமெரிக்கா அணுசக்தி ஒப்பந்தத்துக்கு திரும்புவதற்கு பதிலாக ஈரான் அணு ஆயுதங்கள் பெறுவதை தடுக்க உறுதியான நடவடிக்கைகளை எடுக்க வேண்டும் என வலியுறுத்தி வருகிறது.இதனிடையே ஈரானில் அண்மையில் நடந்து முடிந்த அதிபர் தேர்தலில் தீவிர நிலைப்பாட்டைக் கொண்ட அந்த நாட்டின் சுப்ரீம் கோர்ட்டு நீதிபதி இப்ராகிம் ரைசி வெற்றி பெற்றார். அதன் பின்னர் அவர் எதற்காகவும் அமெரிக்க ஜனாதிபதி ஜோ பைடனை சந்தித்து பேச்சுவார்த்தை நடத்தப்போவதில்லை என திட்டவட்டமாக கூறினார்.

வெள்ளை மாளிகையில் இஸ்ரேல் அதிபர்

இது அணுசக்தி ஒப்பந்த பிரச்சினைக்கு தீர்வு காணும் ஜோ பைடன் முயற்சிக்கு பின்னடைவை தரும் என சர்வதேச நோக்கர்கள் கருதுகின்றனர்.இந்த நிலையில் விரைவில் தனது பதவிக்காலம் முடிவடைய உள்ள நிலையில் இஸ்ரேல் நாட்டின் அதிபர் ரூவன் ரிவ்லின், அதிபராக தனது கடைசி வெளிநாட்டு பயணமாக நேற்று முன்தினம் அமெரிக்காவுக்கு சென்றார்.அங்கு அவர் வெள்ளை மாளிகையில் ஜனாதிபதி ஜோ பைடனை நேரில் சந்தித்து பேச்சுவார்த்தை நடத்தினார். ஈரானுடனான அணுசக்தி ஒப்பந்த விவகாரம், இஸ்ரேல்-பாலஸ்தீனம் இடையிலான மோதல் உள்ளிட்ட பல்வேறு விவகாரங்கள் குறித்து இருநாட்டு தலைவர்களும் விவாதித்தனர்.

ஈரானுக்கு அணு ஆயுதம் கிடைக்காது

இந்த பேச்சுவார்த்தையின்போது ஜனாதிபதி ஜோ பைடன் இஸ்ரேல் அதிபர் ரூவன் ரிவ்லினிடம் அணு ஆயுத ஈரானை தான் ஒருபோதும் சகித்துக்கொள்ள மாட்டேன் என கூறினார். மேலும் தான் அதிகாரத்தில் இருக்கும் போது ஈரானுக்கு ஒருபோதும் அணு ஆயுதம் கிடைக்காது என அவர் திட்டவட்டமாக தெரிவித்தார். ஈராக் மற்றும் சிரியாவில் ஈரான் ஆதரவு பயங்கரவாதிகளின் நிலைகளை குறிவைத்து அமெரிக்க ராணுவம் நடத்திய வான் தாக்குதலுக்கு பிறகு, ஈரானுக்கு எதிரான இந்த கருத்தை ஜோ பைடன் தெரிவித்திருப்பது முக்கியத்துவம் வாய்ந்ததாக பார்க்கப்படுகிறது.

அதே சமயம் ஈரான் இதுகுறித்து உடனடியாக எந்த கருத்தும் தெரிவிக்கவில்லை என்பது குறிப்பிடத்தக்கது.