இஸ்ரேலின் வடக்கு பகுதியில் அமைந்துள்ள அரபு நகரமான உம் அல் பஹ்ம் நகரில் உள்ள ஒரு வனப்பகுதிக்கு அருகே போலீசார் ரோந்து பணியில் ஈடுபட்டிருந்தனர். அப்போது அந்த வனப்பகுதிக்குள் இருந்து மண்வெட்டி மற்றும் மெட்டல் டிடெக்டருடன் வாலிபர்கள் 2 பேர் வெளியே வந்ததை போலீசார் பார்த்தனர். பின்னர் அந்த வாலிபர்கள் இருவரும் காரில் ஏறி அங்கிருந்து புறப்பட்டனர். அவர்கள் மீது சந்தேகமடைந்த போலீசார் வேகமாக சென்று அவர்களின் காரை வழிமறித்து சோதனை செய்தனர். அப்போது காரில் இருந்த தொன்மை வாய்ந்த 2 நாணயங்களை போலீசார் கைப்பற்றினர். அதன் பின்னர் போலீசார் அந்த 2 நாணயங்களையும் தொல்பொருள் ஆணையத்திடம் ஒப்படைத்தனர். தொல்பொருள் ஆய்வாளர்கள் ஆய்வு செய்ததில் அந்த 2 நாணயங்களில் ஒன்று சுமார் 2,300 ஆண்டுகளுக்கு முந்தையது என்பது தெரியவந்தது.