காத்மாண்டு,
நேபாள நாடாளுமன்ற மேலவைக்கான தேர்தல் இன்று நடைபெறுகிறது. அந்த நாட்டின் 7 மகாணங்களுக்கும் நடைபெறவிருக்கும் இந்தத் தேர்தலுக்கான முன்னேற்பாடுகள் அனைத்தும் செய்யப்பட்டுவிட்டதால், தேர்தலை புதன்கிழமை நடத்துவதற்கு தேர்தல் ஆணையம் அனுமதி வழங்கியது.
நேபாளத்துக்கான புதிய அரசமைப்புச் சட்டம் கடந்த 2015-ஆம் ஆண்டு இயற்றப்பட்ட பிறகு நடைபெறும் முதல் பொதுத் தேர்தல் இது என்பது குறிப்பிடத்தக்கது.
நாடாளுமன்றத் தேர்தலுக்கான ஆயத்தப் பணிகள் அனைத்தும் நிறைவடைந்தன. எனவே, திட்டமிட்டபடி புதன்கிழமை தேர்தல் நடைபெறும். என்று தேர்தல் ஆணையம் வெளியிட்டுள்ள அறிக்கையில் தெரிவிக்கப்பட்டுள்ளது. ஏற்கெனவே, 275 இடங்களைக் கொண்ட நாடாளுமன்றக் கீழவைக்கான தேர்தல், கடந்த நவம்பர் 26 மற்றும் டிசம்பர் 7-ஆம் தேதிகளில் இரு கட்டங்களாக நடைபெற்றன.
இந்த நிலையில், 59 உறுப்பினர்களைக் கொண்ட மேலவைக்கான தேர்தல்தான் தற்போது நடைபெறுகிறது. இந்த 59 உறுப்பினர்களில் 56 பேர், வாக்கெடுப்பு முறையில் தேர்ந்தெடுக்கப்படுவார்கள். எஞ்சிய 3 உறுப்பினர்களை அதிபரே பரிந்துரைப்பார். மேலவைக்கான 56 உறுப்பினர்களையும், 1,506 நகர மேயர்கள், துணை மேயர்கள், நகராட்சி மற்றும் ஊராட்சித் தலைவர்கள், துணைத் தலைவர்கள் உள்ளிட்ட 2,056 பேர் வாக்கெடுப்பு முறையில் தேர்ந்தெடுப்பர். அங்குள்ள 7 மாகாணங்களிலும் வாக்குப்பதிவு மையங்கள் அமைக்கப்பட்டுள்ளன. காலை 10 மணி முதல் பிற்பகல் 3 மணி வரை வாக்குப்பதிவு நடைபெறும் என்று அந்நாட்டு தேர்தல் ஆணையம் அறிவித்துள்ளது.