ஜெர்மனியில் நடைபெற்ற 'ஜி-7' நாடுகளின் தலைவர்கள் மாநாட்டில் உக்ரைன் போர் விவகாரம் முக்கிய விவாத பொருளாக அமைந்தது. உக்ரைனுக்கு ஆதரவாக மேற்கொள்ள வேண்டிய நடவடிக்கைகள் குறித்தும் ரஷியாவுக்கு எதிரான நடவடிக்கைளை தீவிரப்படுத்துவது குறித்தும் 'ஜி-7' தலைவர்கள் தீவிரமாக விவாதித்தனர்.

இந்த நிலையில் 'ஜி-7' மாநாட்டின் நிறைவில் பேசிய பிரான்ஸ் அதிபர் மேக்ரான் உக்ரைன் போரில் ரஷியா வெற்றி பெறக்கூடாது என கூறினார். இதுபற்றி அவர் கூறுகையில், " 'ஜி-7' நாடுகள் உக்ரைனுக்கு ஆதரவளிக்கும் மற்றும் ரஷியாவிற்கு எதிரான பொருளாதாரத் தடைகளை தேவைப்படும் வரை மற்றும் தேவையான தீவிரத்துடன் பராமரிக்க உறுதிப்பூண்டுள்ளன. உக்ரைன் போரில் ரஷியாவால் வெற்றி பெற முடியாது, வெற்றி பெறக்கூடாது" என கூறினார்.