ஈராக் மற்றும் சிரியாவில் செயல்பட்ட ஐ.எஸ். பயங்கரவாத இயக்கத்தை உலக நாடுகளின்படை அழிக்கும் பணியில் தீவிரமாக இறங்கி உள்ளது. ஈராக்கில் ஐ.எஸ். பயங்கரவாதிகள் கைவசம் இருந்த மொசூல் நகரத்தை அந்நாட்டு ராணுவம் அமெரிக்க படை உதவியுடன் மீட்டு உள்ளது. பல்வேறு பகுதிகளில் ஐ.எஸ். பயங்கரவாதிகள் தோல்வியை தழுவி வருகின்றனர். அவர்களுடைய அழிகாலம் நெருங்கிக் கொண்டே வருகிறது. இந்நிலையில் சிரியாவில் நடந்த தாக்குதலில் ஐ.எஸ். பயங்கரவாத இயக்க தலைவன் அல்-பாக்தாதி கொல்லப்பட்டான் என தகவல்கள் வெளியாகியது. சிரிய ஊடகங்களும் தகவல்களை வெளியிட்டது. ரஷியாவும் அல்-பாக்தாதி கொல்லப்பட்டதாக தெரிவித்தது.

சிரியாவின் ராக்காவின் தெற்கு புறநகர் பகுதிகளில் நடைபெற்ற கூட்டத்தில் 30 பயங்கரவாத குழு தலைவர்களும், சுமார் 300 பயங்கரவாதிகளும் கொல்லப்பட்டதாக தெரிவிக்கப்பட்டது. இது பயங்கரவாத இயக்கம் தரப்பில் மறுக்கப்பட்டது. அல்-பாக்தாதி கொல்லப்பட்டதாக நம்பப்பட்டு வருகிறது. இவ்விவகாரம் தொடர்பான தகவல்களை அமெரிக்கா உறுதி செய்யாமல் இருந்தது. சிரியாவில் செயல்படும் இங்கிலாந்தின் கண்காணிப்பு குழு அல்-பாக்தாதி கொல்லப்பட்டதாக தெரிவித்து உள்ளது.