ஜெய்பால் ரெட்டி மற்றும் சுஷ்மா சுவராஜ்க்கு வெவ்வேறு சித்தாந்தங்கள் இருந்தன. ஆனால் அவசர நிலைக்குப்பிறகு ஜனதா கட்சியில் அரசியலில் இணைந்திருந்தனர். இந்தியாவை கட்டமைப்பதில் இரண்டு பேருமே தங்கள் அர்ப்பணிப்பில் உறுதியாக இருந்தனர்.

ஒருங்கிணைந்த ஆந்திராவின் அரசியலில் நானும், ஜெய்பால் ரெட்டியும் நீண்ட நாட்கள் பங்காற்றி இருக்கிறோம். மூத்த சட்டசபை உறுப்பினர் என்ற முறையில் அவர் எனது ஆரம்பகட்ட அரசியலில் நட்புரீதியிலான வழிகாட்டியாக இருந்தார். ஆந்திர சட்டசபைக்குள் நான் முதன்முதலில் 1978-ம் ஆண்டில் எம்.எல்.ஏ.யாக அடியெடுத்து வைத்தேன். சட்டசபை நடக்கும் காலகட்டங்களில் காலை உணவுக்காக எங்கள் வீடுகளில் நாங்கள் சந்திப்பது வழக்கம். சட்டசபையில் நடக்கும் அன்றைய நிகழ்வுகள் குறித்து ஆலோசிப்போம். அன்றைய நாட்களில் சட்டசபையில் எங்களது தலையீடுகள்தான் மறுநாளில் பத்திரிகைகளில் தலைப்புச் செய்திகளாக இடம்பெற்றிருக்கும்.

நிலச்சுவான் குடும்பத்தில் பிறந்திருந்தாலும், சமத்துவம், உரிமைகள் ஆகியவை ஜெய்பால் ரெட்டியின் அரசியல் வாழ்க்கையை தூண்டிவிட்டன. அவர் எடுத்திருந்த அரசியல் கோட்பாடுகளை எந்தவிதத்திலும், எதற்காகவும் சமரசம் செய்துகொள்ளவும் இல்லை, அதற்காக குரல் கொடுக்க அவர் தயங்கியதும் இல்லை. தேசத்தில் வரவேண்டிய மாற்றங்கள் பற்றியும், அரசியலில் நிகழும் மாற்றங்கள் பற்றியும் நாங்கள் இரண்டு பேரும் அடிக்கடி கலந்தாலோசிப்போம்.

அரசியலில் எனது ஆத்ம துணையாக இருந்தவர் சுஷ்மா சுவராஜ். அவரது வாழ்நாளின் இறுதிவரையில் எங்களுக்கிடையே இருந்த நல்லுறவு நாளுக்கு நாள் வலுவடைந்து வந்தது. சுஷ்மாவுக்கு எனது இறுதி அஞ்சலியை செலுத்தச் சென்றபோது, அவரது மகள் பன்சுரி அழுதபடி என்னிடம் ஒன்றைக் கூறினார். அவர், வெங்கையா நாயுடுவை சந்தித்துவிட்டு வரும்போதெல்லாம் எனது பிரச்சினைகளில் இருந்து நீங்கிவிட்டதாக உணர்ந்து புத்துணர்வு பெறுவேன். ஒரு தங்கைக்கு அண்ணன் கொடுக்கும் ஆலோசனையாகவே அவை இருக்கும் என்று எனது தாயார் (சுஷ்மா) அடிக்கடி குறிப்பிடுவார் என்று என்னிடம் தெரிவித்தார்.

எனது அன்பு மிகுந்த தங்கையை என் கையில் இருந்து இந்த கொடிய விதி பிரித்துச் சென்றுவிட்டதே. பல்வேறு திருப்பங்கள் நிறைந்த சுஷ்மா சுவராஜின் அரசியல் வாழ்க்கையோடு நான் பயணித்திருக்கிறேன். தோல்வியிலும் சரி, வெற்றியிலும் சரி, அவர் துணிச்சலுடனும், அமைதியுடனும்தான் இருப்பார். அவரது உடைகள், செய்கைகள், பேசும்போது பயன்படுத்தும் வார்த்தைகள், உணர்வுகளை வெளிப்படுத்தும் தன்மை, அன்புகாட்டுவது, அமைதி, மூத்தவர்களிடம் காட்டும் பணிவு, மற்றவர்களை காயப்படுத்தாமல் உரையாற்றுவது போன்றவையெல்லாம் இந்த நவீன காலத்தில் சுஷ்மாவை எளிதில் அணுகக்கூடிய அரசியல் தலைவர்களுள் ஒருவராக உருவாக்கியது. அனைத்து அரசியல் கட்சியினரிடமும், பொதுமக்களிடமும் அவருக்கு மதிப்பையும், மரியாதையையும் அவரது குணாதிசயங்கள் பெற்றுத்தந்தன.

ஜெய்பால் ரெட்டியும், சுஷ்மா சுவராஜும் வரம் பெற்ற பேச்சாளர்கள். ஆங்கிலத்தில் மிகுந்த புலமை பெற்றிருந்தவர் ஜெய்பால் ரெட்டி. இந்தியில் மிகத்தெளிவாக பேசக்கூடிய சுஷ்மாவுக்கு சமஸ்கிருதத்திலும், இந்திய கலாசாரத்திலும் ஆழ்ந்த அறிவு இருந்தது. நாடாளுமன்றத்தில் எழுந்து பேசும்போதெல்லாம் இரண்டு பேரும் அனைவரது கவனத்தையும் ஈர்த்துவிடுவார்கள்.

சுஷ்மா சுவராஜின் அரசியல் வாழ்க்கை உறுதியாக மேலே சென்றது. ஜெய்பால் ரெட்டியின் அரசியல் வாழ்க்கையில் ஏற்ற இறக்கங்கள் இருந்தன. இரண்டு பேருமே புகழப்படத்தக்கவர்கள். அதை அவர்கள் அடைந்திருக்கிறார்கள். அனேக அனுபவங்கள், அதிக அறிவாற்றல் கொண்ட அரசியல் தலைவர்கள் குழுவில் இவர்களும் உள்ளனர். இளம் அரசியல்வாதிகளுக்கு இவர்கள் முன்மாதிரியாக உள்ளனர்.

உடலளவில் அவர்கள் நம்மிடம் இல்லை என்றாலும், அவர்களின் குரல் இன்றும் நம்மிடையே ஒலித்துக்கொண்டு இருக்கிறது. அது அவர்களை நம்மிடம் இருப்பதாகவே உணரச் செய்கிறது. இன்னும் பல ஆண்டுகள் மற்றவர்களுக்கு அவர்கள் உத்வேகம் அளிக்கக்கூடியவர்களாக இருப்பார்கள்.

வெங்கையா நாயுடு, இந்திய துணை ஜனாதிபதி.