பெண்களுக்கான இடஒதுக்கீடு நனவாகிறது

உள்ளாட்சி அமைப்புகளில் பெண்களுக்கு 50 சதவீத ஒதுக்கீடு ஜெயலலிதாவால் கொண்டுவரப்பட்டு இன்றளவும் நடைமுறையில் இருக்கிறது. ஆனால் உள்ளாட்சி அமைப்புகளுக்கு சட்டத்தை இயற்றும் அதிகாரம் கிடையாது. எனவே சர்வ வல்லமை படைத்த சட்டசபையிலும், நாடாளுமன்றத்திலும் பெண்களுக்கு 33 சதவீத இடஒதுக்கீடு வழங்கவேண்டும் என்ற கோரிக்கையும், முயற்சியும் பல ஆண்டுகளாக இருந்தாலும் அது மோடி ஆட்சியில் கடந்த 2023-ம் ஆண்டு நிறைவேறியது. இப்போது சட்டம் கையில் இருந்தாலும் உடனடியாக அதை நிறைவேற்றமுடியாத நிலை இருக்கிறது.

காரணம், இந்த சட்டத்தின்படி 10 ஆண்டுகளுக்கு ஒருமுறை எடுக்கப்படும் மக்கள் தொகை கணக்கெடுப்பின்படி தொகுதிகள் வரையறை செய்யப்பட்டு, அதன்பிறகுதான் இந்த சட்டத்தை நிறைவேற்றமுடியும். இப்போதுள்ள கால அட்டவணைப்படி இந்த பணி 2030-க்கு பிறகுதான் முடியும். ஆனால் மத்திய அரசு 2029 நாடாளுமன்ற தேர்தலிலேயே பெண்கள் ஒதுக்கீடு சட்டத்தை அமல்படுத்தவும், அதற்கு முன்பாக 2011-ம் ஆண்டின்

கணக்கெடுப்புப்படியே தொகுதி வரையறை நடவடிக்கைகளை மேற்கொள்ளவும் ஏதுவாக 2 அரசியல் சட்ட திருத்தங்களை கொண்டுவர திட்டமிட்டுள்ளது. இந்த திருத்தங்களை நிறைவேற்ற நாடாளுமன்றத்தின் இரு அவைகளிலும் மூன்றில் இரண்டு பங்கு உறுப்பினர்களின் ஆதரவும், பெரும்பான்மையான மாநில சட்டசபைகளின் ஆதரவும் வேண்டும்.

இந்த திருத்தங்களை நிறைவேற்றுவதற்கு அனைத்து கட்சிகளின் ஆதரவையும் பா.ஜனதா கோர இருக்கிறது. தொகுதி வரையறை முடிக்கப்பட்டு இந்த திருத்தங்களும் நிறைவேற்றப்பட்டால் மக்களவை உறுப்பினர்களின் எண்ணிக்கை 543-ல் இருந்து 816 ஆக உயரும். அப்போது அதில் பெண்களுக்கான பிரதிநிதித்துவம் 273 ஆக இருக்கும். இதுபோல ஆதிதிராவிடருக்கான இடம் 84-ல் இருந்து 126 ஆகவும், பழங்குடியினருக்கான இடம் 47-ல் இருந்து 70 ஆகவும் உயரும். இதனால் ஒவ்வொரு மாநிலங்களில் உள்ள எம்.பி.க்களின் எண்ணிக்கையும் உயரும் என்றாலும், அவர்கள் கணக்கிட்டுள்ள விகிதாசாரத்தின்படி தமிழ்நாட்டு எம்.பி.க்களின் எண்ணிக்கை 39-ல் இருந்து 59 ஆக உயர வாய்ப்பு இருக்கிறது. அதேநேரத்தில் உத்தரபிரதேச எம்.பி.க்களின் எண்ணிக்கை 80-ல் இருந்து 120 ஆக உயரும். இந்த 2 திருத்தங்களினால் சில குறைகள் இருந்தாலும், நாடாளுமன்றங்களிலும், சட்டசபைகளிலும் 2029-க்கு பிறகு பெண்களின் குரல் ஓங்கி ஒலிக்கும் என்பதில் மகிழ்ச்சியே.