பொதுமக்களுக்கு ஏன் இந்த தண்டனை?

தமிழ்நாடு, புதுச்சேரி உள்பட 5 மாநிலங்களில் சட்டசபை தேர்தல் அறிவிப்பை தேர்தல் கமிஷன் வெளியிட்டுள்ளதால், நடத்தை விதிகளும் உடனடியாக அமலுக்கு வந்துவிட்டன. அரசு கொள்கை சார்ந்த எந்த முடிவுகளும் எடுக்கமுடியாது. இப்போது நிர்வாக கட்டுப்பாடு தேர்தல் கமிஷனின் கைக்கு போய்விட்டது. மேற்கு வங்காளத்தில் தலைமைச்செயலாளர், போலீஸ் டி.ஜி.பி., கொல்கத்தா மாநகர போலீஸ் கமிஷனர் என்று உயர் அதிகாரிகள் மாற்றப்பட்டுள்ளனர். தமிழ்நாட்டிலும் 4 மாவட்ட போலீஸ் சூப்பிரண்டுகளை தேர்தல் கமிஷன் மாற்றிவிட்டது. இந்த பட்டியல் இன்னும் தொடர்ந்து, மேலும் பல அதிகாரிகள் மாற்றப்படுவார்கள் என்று எதிர்பார்க்கப்படுகிறது. அரசுக்குத்தான் கஷ்டம் என்றால் பொதுமக்களுக்கும் தேர்தல் நடத்தை விதிகளால் இடர்பாடுகள் அதிகரித்துள்ளது.

ரூ.50 ஆயிரத்துக்கு மேல் ரொக்கமாக கையில் எடுத்து சென்றால் தேர்தல் கமிஷனின் பறக்கும் படையினர் சோதனை போடும்போது கண்டுபிடிக்கப்பட்டால் பறிமுதல் செய்யப்படும். பிறகு உரிய ஆவணங்களை தாக்கல் செய்தால் மட்டுமே பல நாட்களுக்கு பிறகு அந்த பணம் கிடைக்கும். ஏனென்றால் அதிகாரிகள் பணத்தை கைப்பற்றியவுடன் அரசு கருவூலத்தில் கட்டி விடுவார்கள். திருப்பூர் மாவட்டம் பல்லடம்-உடுமலை ரோட்டில் சித்தம்பலம் பகுதியில் பறக்கும் படையினர் வாகன சோதனையில் ஈடுபட்டுக்கொண்டிருந்தனர். அப்போது தனது மாமியாரை கோவையில் உள்ள ஆஸ்பத்திரிக்கு சிகிச்சைக்காக அழைத்துச்சென்ற ஒருவர் அதற்காக கைவசம் வைத்திருந்த ரூ.2 லட்சத்தை, பறக்கும் படையினர் கைப்பற்றியவுடன் அந்த பெண்ணின் மகள் நந்தினி கதறி அழுத படம் தினத்தந்தியில் நேற்று பிரசுரமாகியிருந்தது. இந்த படம் பார்ப்பவர்களின் கண்களையும் குளமாக்கியது.