ஜோகனர்ஸ்பர்க்,
தென்ஆப்பிரிக்காவில் சுற்றுப்பயணம் மேற்கொண்டுள்ள இந்திய கிரிக்கெட் அணி 3 டெஸ்ட், 3 ஒருநாள் போட்டிகள் கொண்ட தொடரில் விளையாடி வருகிறது. டெஸ்ட் தொடரை 2-1 என்ற என்ற கணக்கில் தென் ஆப்பிரிக்கா கைப்பற்றியுள்ளது.
3 போட்டிகள் கொண்ட ஒரு நாள் தொடரில் பார்ல் நகரில் நடந்த முதல் ஒருநாள் போட்டியில் தென்ஆப்பிரிக்கா 31 ரன்கள் வித்தியாசத்தில் வெற்றி பெற்று தொடரில் 1-0 என்ற கணக்கில் முன்னிலை வகிக்கிறது. இந்தியா-தென்ஆப்பிரிக்கா அணிகளுக்கு இடையிலான 2-வது ஒரு நாள் போட்டி பார்ல் நகரில் உள்ள மைதானத்தில் இன்று நடைபெற்று வருகிறது.
இந்த போட்டியில் டாஸ் வென்ற இந்திய அணி பேட்டிங்கை தேர்வு செய்தது. இதைத் தொடர்ந்து முதலாவதாக களமிறங்கிய கேப்டன் கே.எல். ராகுல் 4 பவுண்டரிகளுடன் அரை சதம் விளாசினார். அவர் 55 (79) ரன்களில் வான்டெர் துஸ்சென்னிடம் கேட்ச் கொடுத்து வெளியேறினார்.
தவான் 29 ரன்கள் எடுத்து அவுட்டானார். விராட் கோலி டக் அவுட்டானார். தொடர்ந்து களமிறங்கிய ரிஷாப் பண்ட் அதிரடியாக ஆடி10 பவுண்டரிகள், 2 சிக்சர்கள் என மொத்தம் 85 (71 பந்துகள்) ரன்கள் எடுத்து ஆட்டமிழந்தார். ஸ்ரேயாஸ் அய்யர் 11 ரன்கள், வெங்கடேஷ் அய்யர் 22 ரன்கள் எடுத்திருந்த நிலையில் ஆட்டமிழந்தனர்.
இந்த நிலையில் 50 ஓவர்கள் முடிவில் இந்திய அணி 6 விக்கெட்டுகள் இழப்பிற்கு 287 ரன்கள் எடுத்திருந்தது. அஸ்வின் 25 ரன்கள் மற்றும் ஷர்துல் தாக்குர் 40 ரன்கள் எடுத்து ஆட்டமிழக்காமல் இருந்தனர். இதனால் தென்ஆப்பிரிக்க அணிக்கு 288 ரன்கள் வெற்றி இலக்காக நிர்ணயிக்கப்பட்டுள்ளது.