புதுடெல்லி,

விஜய் ஹசாரே கோப்பை கிரிக்கெட் தொடரில், டெல்லி பெரோஸ்ஷா கோட்லா மைதானத்தில் நேற்று நடந்த முதலாவது அரைஇறுதியில் முன்னாள் சாம்பியனான கர்நாடக அணி, மராட்டியத்தை எதிர்கொண்டது. இதில் முதலில் பேட் செய்த மராட்டிய அணி 44.3 ஓவர்களில் 160 ரன்னில் ஆல்-அவுட் ஆனது. தொடர்ந்து ஆடிய கர்நாடகம் 30.3 ஓவர்களில் ஒரு விக்கெட் இழப்புக்கு 164 ரன்கள் சேர்த்து 9 விக்கெட் வித்தியாசத்தில் வெற்றி கண்டு இறுதிப்போட்டிக்கு முன்னேறியது. தொடக்க ஆட்டக்காரர் மயங்க் அகர்வால் 81 ரன்களும் (86 பந்து, 8 பவுண்டரி, ஒரு சிக்சர்), கேப்டன் கருண்நாயர் 70 ரன்களும் (90 பந்து, 10 பவுண்டரி) எடுத்தனர். மயங்க் அகர்வால் இந்த தொடரில் இதுவரை 7 ஆட்டங்களில் ஆடி 3 சதம், 3 அரைசதத்துடன் 633 ரன்கள் சேர்த்துள்ளார். இதன் மூலம் ஒரு சீசனில் விஜய் ஹசாரே போட்டியில் அதிக ரன்கள் குவித்தவர் என்ற சாதனையை மயங்க் அகர்வால் படைத்தார். இதே மைதானத்தில் இன்று நடக்கும் 2-வது அரைஇறுதியில் ஆந்திரா-சவுராஷ்டிரா அணிகள் மோதுகின்றன.