டல்லாஸ்,
மேஜர் லீக் கிரிக்கெட் தொடர் அமெரிக்காவில் நடைபெற்று வருகிறது. இந்த தொடரில் இந்திய நேரப்படி இன்று காலை 6 மணிக்கு நடைபெற்ற லீக் ஆட்டத்தில் எம்.ஐ.நியூயார்க் - வாஷிங்டன் ப்ரீடம் அணிகள் மோதின.
இந்த ஆட்டத்தில் முதலில் பேட்டிங் ஆடிய வாஷிங்டன் ப்ரீடம் அணி 20 ஒவர்களில் 5 விக்கெட்டை இழந்து 182 ரன்கள் குவித்தது. வாஷிங்டன் ப்ரீடம் தரப்பில் அதிகபட்சமாக ஆண்ட்ரிஸ் கவுஸ் 59 ரன்னும், டிராவிஸ் ஹெட் 54 ரன்னும் எடுத்தனர். நியூயார்க் அணி தரப்பில் ரஷித் கான், பொல்லார்ட் ஆகியோர் தலா 2 விக்கெட்டுகள் வீழ்த்தினர்.
இதையடுத்து 183 ரன் எடுத்தால் வெற்றி என்ற இலக்குடன் ஆடிய நியூயார்க் அணியினர் வாஷிங்டன் ப்ரீடம் அணியின் பந்துவீச்சை தாக்குப்பிடிக்க முடியாமல் அடுத்தடுத்து விக்கெட்டுகளை இழந்து தடுமாறினர்.
வெறும் 13.3 ஓவர்கள் மட்டுமே தாக்குப்பிடித்த நியூயார்க் அணி அனைத்து விக்கெட்டுகளையும் இழந்து 88 ரன்கள் மட்டுமே எடுத்தது. இதன் மூலம் 94 ரன் வித்தியாசத்தில் வாஷிங்டன் ப்ரீடம் அணி அபார வெற்றி பெற்றது.
நியூயார்க் தரப்பில் அதிகபட்சமாக ரொமாரியோ ஷெப்பர்ட் 25 ரன்கள் எடுத்தார். வாஷிங்டன் அணி தரப்பில் ஜஸ்தீப் சிங் 3 விக்கெட், மார்கோ ஜான்சென், லாக்கி பெர்குசன், கிளென் மேக்ஸ்வெல் ஆகியோர் தலா 2 விக்கெட்டுகள் வீழ்த்தினர். இந்த வெற்றியின் மூலம் வாஷிங்டன் ப்ரீடம் அணி அடுத்த சுற்றுக்கு முன்னேறியது.