மும்பை,
8 அணிகள் இடையிலான 10-வது ஐ.பி.எல். 20 ஓவர் கிரிக்கெட் போட்டி தொடர் இறுதி கட்டத்தை எட்டி விட்டது. நேற்று முன்தினத்துடன் லீக் ஆட்டங்கள் முடிவுக்கு வந்தன. நேற்று ஓய்வு நாளாகும்.
லீக் ஆட்டங்கள் முடிவில் மும்பை இந்தியன்ஸ் அணி 10 வெற்றி, 4 தோல்வியுடன் 20 புள்ளியும், ரைசிங் புனே சூப்பர் ஜெயன்ட் அணி 9 வெற்றி, 5 தோல்வியுடன் 18 புள்ளியும், ஐதராபாத் சன் ரைசர்ஸ் அணி 8 வெற்றி, 5 தோல்வியுடன் (ஒரு ஆட்டம் முடிவில்லை) 17 புள்ளியும், கொல்கத்தா நைட் ரைடர்ஸ் அணி 8 வெற்றி, 6 தோல்வியுடன் 16 புள்ளியும் பெற்று முறையே முதல் 4 இடங்களை பிடித்து இறுதிப்போட்டிக்கு முந்தைய பிளே-ஆப் சுற்றுக்கு முன்னேறியது.
கிங்ஸ் லெவன் பஞ்சாப் அணி 7 வெற்றி, 7 தோல்வியுடன் 14 புள்ளியும், டெல்லி டேர்டெவில்ஸ் அணி 6 வெற்றி, 8 தோல்வியுடன் 12 புள்ளியும், குஜராத் லயன்ஸ் அணி 4 வெற்றி, 10 தோல்வியுடன் 8 புள்ளியும், பெங்களூரு ராயல் சேலஞ்சர்ஸ் அணி 3 வெற்றி, 10 தோல்வியுடன் (ஒரு ஆட்டம் முடிவில்லை) 7 புள்ளியும் பெற்று முறையே 5 முதல் 8 இடங்களை தனதாக்கி அடுத்த சுற்று வாய்ப்பை இழந்து வெளியேறின.
இந்த நிலையில் இறுதிப்போட்டிக்கான முதலாவது தகுதி சுற்று போட்டி மும்பை வான்கடே மைதானத்தில் இன்று நடக்கிறது. இதில் புள்ளி பட்டியலில் முதல் இரண்டு இடங்களை பிடித்த மும்பை இந்தியன்ஸ்-ரைசிங் புனே சூப்பர் ஜெயன்ட் அணிகள் பலப்பரீட்சை நடத்துகின்றன. இந்த ஆட்டத்தில் டாஸ் வென்ற மும்பை இந்தியன்ஸ் அணியின் கேப்டன் ரோகித் ஷர்மா பந்து வீசுவதாக அறிவித்தார். இதன்படி புனே அணி முதலில் பேட் செய்ய உள்ளது.