புது டெல்லி,
வெஸ்ட் இண்டீஸ்-இந்தியா அணிகளுக்கு இடையேயான 3-வது டி20 போட்டி நேற்று நடைபெற்றது. இப்போட்டியில் இந்திய அணி 7 விக்கெட் வித்தியாசத்தில் அபார வெற்றி பெற்றது. சூர்யகுமார் யாதவ் 44 பந்துகளில் 76 ரன்கள் எடுத்து வெற்றிக்கு வித்திட்டார். ஆட்டநாயகன் விருதும் பெற்றார்.
இந்த வெற்றியின் மூலம் 5 போட்டிகள் கொண்ட டி-20 தொடரில் 2-1 என்ற கணக்கில் இந்திய அணி முன்னிலையில் உள்ளது. இந்த ஆட்டத்தில் இந்திய கேப்டன் ரோகித் சர்மா 11 ( 5 பந்து ) ரன்கள் எடுத்திருந்த நிலையில் தசைபிடிப்பு காரணமாக வெளியேறினார். இந்த போட்டியில் ரோகித் ஷர்மா 1 சிக்ஸ் அடித்தார்.
இந்த சிக்ஸின் மூலம் கேப்டனாக டி-20 போட்டிகளில் அவரது சிக்ஸ் எண்ணிக்கை 60 ஆக அதிகரித்துள்ளது. இதன் மூலம் டி-20 போட்டிகளில் இந்திய கேப்டன்களில் அதிக சிக்ஸ் அடித்தவர் என்ற சாதனையை ரோகித் சர்மா படைத்துள்ளார். அவருக்கு அடுத்த இடத்தில் முன்னாள் கேப்டன்கள் விராட் கோலி 59 சிக்ஸ், மகேந்திர சிங் தோனி 34 சிக்ஸ்களுடன் அடுத்தடுத்த இடங்களில் உள்ளனர்.