பெர்த்,
ஜூலை மற்றும் ஆகஸ்டு மாதம் நடைபெறும் பாரீஸ் ஒலிம்பிக் போட்டிக்கு தயாராகும் பொருட்டு இந்திய ஆக்கி அணி, ஆஸ்திரேலியாவில் சுற்றுப்பயணம் செய்து அந்நாட்டு அணிக்கு எதிராக 5 போட்டிகள் கொண்ட தொடரில் விளையாடுகிறது.
அதன்படி இவ்விரு அணிகளுக்கு இடையிலான முதலாவது போட்டி பெர்த்தில் இன்று (சனிக்கிழமை) நடைபெற்றது.
உள்ளூர் சாதகத்தை பயன்படுத்திய ஆஸ்திரேலிய அணி ஆரம்பம் முதலே ஆதிக்கம் செலுத்தியது. அடுத்தடுத்து கோல்களை போட்டு தள்ளிய ஆஸ்திரேலிய அணி 5-1 என்ற கோல் கணக்கில் இந்தியாவை வீழ்த்தி வெற்றி பெற்றது.
ஆஸ்திரேலியா தரப்பில் டாம் விக்காம் 2 கோல்களும், டிம் பிராண்ட், ஜோயல் ரிண்டலா, பிளின் ஓகிளிவ் ஆகியோர் தலா ஒரு கோலும் அடித்தனர். இந்தியா சார்பில் குர்ஜந்த் சிங் மட்டுமே ஒரு கோல் அடித்தார்.
இந்த வெற்றியின் மூலம் இந்தியாவுக்கு எதிரான 5 போட்டிகள் கொண்ட தொடரில் ஆஸ்திரேலியா 1-0 என்ற கணக்கில் முன்னிலை பெற்றுள்ளது.