பாரீஸ் ஒலிம்பிக் போட்டிக்கான குத்துச்சண்டை தகுதி சுற்று பாங்காக்கில் நடந்து வருகிறது. இதில் நேற்று நடந்த பெண்களுக்கான 60 கிலோ எடைபிரிவின் 3-வது சுற்று ஆட்டம் ஒன்றில் முன்னாள் உலக ஜூனியர் சாம்பியனான அங்குஷிதா போரோ (இந்தியா) 4-1 என்ற கணக்கில் ஆசிய சாம்பியன் ரிம்மா வோலோசென்கோவை (கஜகஸ்தான்) சாய்த்து கால்இறுதிக்குள் கால்பதித்தார். முன்னதாக 66 கிலோ எடைபிரிவின் 2-வது சுற்றில் இந்திய வீராங்கனை அருந்ததி சவுத்ரி 5-0 என்ற கணக்கில் பியர்டோ ரிகோவின் ஸ்டெபானி பைனிரோவை வென்று 3-வது சுற்றுக்கு முன்னேறினார்.

ஆண்களுக்கான 71 கிலோ எடைபிரிவில் இந்தியாவின் நிஷாந்த் தேவ் 5-0 என்ற கணக்கில் தாய்லாந்தின் பீரபட் யேசங்னோனை தோற்கடித்து கால்இறுதிக்கு தகுதி பெற்றார். 92 கிலோவுக்கு அதிகமான எடைபிரிவில் ஆசிய போட்டியில் வெண்கலம் வென்ற இந்திய வீரர் நரேந்தர் பெர்வால் 2-3 என்ற கணக்கில் ஈகுவடாரின் ஜெர்லோன் கில்மார் காங்கோ ஷாலாவிடம் போராடி சரிந்தார்.