கவுகாத்தி,

3-வது கேலோ இந்தியா இளையோர் விளையாட்டு போட்டி அசாம் மாநிலம் கவுகாத்தியில் நடந்து வருகிறது. இதில் நேற்று நடந்த கைப்பந்து போட்டியில் 21 வயதுக்கு உட்பட்ட ஆண்கள் பிரிவில் தொடக்க லீக் ஆட்டத்தில் தமிழக அணி 25-21, 25-18, 25-16 என்ற நேர்செட்டில் இமாச்சலபிரதேசத்தை தோற்கடித்தது. இதே வயது பெண்கள் பிரிவில் தமிழக அணி 25-23, 25-22, 25-22 என்ற நேர்செட்டில் அரியானாவை வீழ்த்தியது. பெண்களுக்கான 17 வயதுக்கு உட்பட்ட பிரிவில் முதலாவது லீக் ஆட்டத்தில் தமிழக அணி 20-25, 18-25, 15-25 என்ற நேர்செட்டில் மேற்கு வங்காளத்திடம் பணிந்தது.

கபடி போட்டியில் பெண்களுக்கான 17 வயதுக்கு உட்பட்ட பிரிவில் தமிழக அணி 26-20 என்ற புள்ளி கணக்கில் பீகாரை வீழ்த்தி 3-வது வெற்றியை ருசித்ததுடன் அரைஇறுதியை உறுதி செய்தது. 21 வயதுக்கு உட்பட்ட ஆண்கள் பிரிவில் தமிழக அணி 29-37 என்ற புள்ளி கணக்கில் உத்தரபிரதேசத்திடம் வீழ்ந்தது. இதே வயது பெண்கள் பிரிவில் தமிழக அணி 19-21 என்ற புள்ளி கணக்கில் அசாமிடம் தோல்வி அடைந்தது. தோல்வி அடைந்த தமிழக அணிகள் அரைஇறுதி வாய்ப்பை இழந்தன.